ଭୁବନେଶ୍ୱର : (ଓଡ଼ିଆ ନ୍ୟୁଜ୍) ବାଲିପାଟଣା ସ୍ଥିତ ବୁଦ୍ଧକେଶ୍ୱର ମନ୍ଦିର ସଂଲଗ୍ନ ୨୨ ଏକର ପରିମିତ ପଡିଆରେ ସଜାଗ ପକ୍ଷରୁ ଆୟୋଜିତ ବୃକ୍ଷ ରୋପଣ କାର୍ଯ୍ୟକ୍ରମରେ ଭୁବନେଶ୍ୱର ସାଂସଦ ଅପରାଜିତା ଷଡଙ୍ଗୀ ମୁଖ୍ୟ ଅତିଥି ଭାବେ ଯୋଗଦେଇ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ । ଅନୁଷ୍ଠାନର ମୁଖ୍ୟ ପ୍ରଶାନ୍ତ ଆଦିତ୍ୟଙ୍କ ସମେତ ଅନୁଷ୍ଠାନର ଶତଧିକ କର୍ମୀ ଏଥିରେ ଯୋଗଦେଇ ବୃକ୍ଷରୋପଣ କରିଥିଲେ । ଏଠାରେ ୫ ହଜାର ବୃକ୍ଷରୋପଣ କରାଯିବ ବୋଲି କହିଥିଲେ ପ୍ରଶାନ୍ତ । ବନ ବିଭାଗ ପକ୍ଷରୁ ଯଦୁମଣି ଦାସ ୧୫ ଜଣ ବିଭାଗୀୟ କର୍ମଚାରୀଙ୍କ ସହ ଏଥିରେ ସାମିଲ ହୋଇଥିଲେ । ଆଗାମୀ ଦିନରେ ୨ଏକର ଅଧିକ ଜମିରେ ଆମ୍ବ, ପଣସ ଓ ନଡିଆ ଚାରା ରୋପଣ କରାଯିବାର କାର୍ଯ୍ୟକ୍ରମ ରହିବ । ଆଜି ଅଁଳା, ବାହାଡା, ହରିଡା, ବେଲ, ନିମ୍ବ ଓ ବଉଳ ବୃକ୍ଷ ରୋପଣ କରାଯାଇଥିଲା । ଲଗାଯାଇଥିବା ବୃକ୍ଷର ରକ୍ଷଣାବେକ୍ଷଣ ଲାଗି ସଜାଗ ପକ୍ଷରୁ ବେଣୁ ବୋଇଙ୍କୁ ଦାୟିତ୍ୱ ଦିଆଯାଇଛି । କାର୍ଯ୍ୟକ୍ରମରେ ସ୍ଥାନୀୟ ଅଞ୍ଚଳର ହଜାର ହଜାର ଯୁବକ, ମହିଳା ଯୋଗଦେଇ ସାଂସଦ ଶ୍ରୀମତି ଷଡଙ୍ଗୀଙ୍କୁ ସହଯୋଗ କରିଥିଲେ ।
