ଭୁବନେଶ୍ୱର : ସାପ୍ତାହିକ ସମ୍ବାଦପତ୍ର ପ୍ରତିଜ୍ଞାର ତ୍ରୟୋଦଶ ବାର୍ଷିକ ଉତ୍ସବ ଭୁବନେଶ୍ୱରର ଗୀତ ଗୋବିନ୍ଦ ସଦନ ଠାରେ ଅନୁଷ୍ଠିତ ହୋଇଯାଇଛି । ତରୁଣ କୁମାର ନନ୍ଦଙ୍କ ସଭାପତିତ୍ୱରେ ଅନୁଷ୍ଠିତ ଏହି ଉତ୍ସବରେ ଉଦଘାଟକ ଭାବେ ରାଜ୍ୟ ସହକାରୀ ମୁଖ୍ୟ ସଚେତକ ପ୍ରଶାନ୍ତ ମୁଦୁଲି ଯୋଗଦେଇ ଉଦଘାଟନ କରି କହିଥିଲେ ଗଣମାଧ୍ୟମ ସମାଜର ମଙ୍ଗଳ ପାଇଁ ଖବର ପରିବେଶଣ କରନ୍ତୁ । ମୁଖ୍ୟ ଅତିଥି ଭାବେ ଜଗତସିଂହପୁର ସାଂସଦ ରାଜଶ୍ରୀ ମଲ୍ଲିକ ଯୋଗଦେଇ କହିଥିଲେ ଛୋଟ ଓ ବଡ ଖବର କାଗଜ ମଧ୍ୟରେ କିଛି ପାର୍ଥକ୍ୟ ନାହିଁ । ଯଦି ଛୋଟ ଖବରକାଗଜ ସଠିକ, ନିର୍ଭୁଲ ଓ ତଥ୍ୟ ଭିିକ ଖବର ପରିବେଶଣ କରେ ସେ ନିଶ୍ଚିତ ପାଠକାଦୃତ ଲାଭ କରିପାରିବ । ମୁଖ୍ୟବକ୍ତା ଭାବେ ବିଶିଷ୍ଟ କବି ତଥା ପୂର୍ବତଟ ରେଳବାଇ ବିଭାଗର ଜନ ସମ୍ପର୍କ ଅଧିକାରୀ ନିରାକର ଦାସ, ସମ୍ମାନୀତ ବକ୍ତା ଭାବେ ବରିଷ୍ଠ ସମ୍ବାଦିକ ନୃସିଂହ ନାରାୟଣ ଦାସ ଯୋଗଦେଇ ସମ୍ବାଦପତ୍ରର ଭୂମିକା ସମ୍ପର୍କରେ ଆଲୋକପାତ କରିଥିଲେ । ପ୍ରତିଜ୍ଞାର ସମ୍ପାଦକ ଅଶୋକ କୁମାର ସାହୁ ସ୍ୱାଗତ ଭାଷଣ ରଖିବା ସହ କହିଥିଲେ ଆପଣ ମାନଙ୍କ ଆଶୀର୍ବାଦ ଓ ସ୍ନେହ ଶ୍ରଦ୍ଧାରେ ପ୍ରତିଜ୍ଞା ଆଗାମୀ ଦିନରେ ଦୈନିକ ଖବରକାଗଜରେ ପରିଣତ ହେବାକୁ ଯାଉଛି । ଏହି ଅବସରରେ ସାମ୍ବାଦିକତା, ସମାଜସେବା ଓ ଅନ୍ୟାନ୍ୟ କ୍ଷେତ୍ରରେ ପାରଦର୍ଶିତା ଅର୍ଜନ କରିଥିବା ବ୍ୟକ୍ତି ବିଶେଷଙ୍କୁ ସମ୍ବର୍ଦ୍ଧିତ କରାଯାଇଥିଲା । ଡଃ ଦେବାଶିଷ ମିଶ୍ର ମଂଚ ସଂଚାଳନ କରିଥିବା ବେଳେ ପରିଚାଳନା ସମ୍ପାଦକ ବିକ୍ରମ ଦେବ ମିଶ୍ର ସମସ୍ତଙ୍କୁ ଧନ୍ୟବାଦ ଅର୍ପଣ କରିଥିଲେ ।
