ଭୁବନେଶ୍ଵର: ନାବାର୍ଡ କଟକ ପକ୍ଷରୁ ତ୍ରିଶୂଳିଆ ବଜାର ସ୍ଥିତ ଏକ ମଣ୍ଡପରେ ଜିଲ୍ଲାସ୍ତରୀୟ ମେଗା ଋଣ ମେଳା ଓ ଆର୍ଥିକ ସାକ୍ଷରତା କାର୍ଯ୍ୟକ୍ରମ ଅନୁଷ୍ଠିତ ହୋଇଛି। ନାବାର୍ଡ କଟକ ଜିଲ୍ଲା ଡିଜିଏମ୍ ପ୍ରକସୀମା ପରିଡ଼ାଙ୍କ ସଂଯୋଜନାରେ ଆୟୋଜିତ ଏହି କାର୍ଯ୍ୟକ୍ରମରେ କଟକ ସାଂସଦ ଭର୍ତ୍ତୁହରି ମହତାବ ମୁଖ୍ୟ ଅତିଥି ଭାବେ ଯୋଗ ଦେଇଥିଲେ। ନାବାର୍ଡର ଏହି କାର୍ଯ୍ୟକ୍ରମକୁ ସେ ପ୍ରଶଂସା କରିବା ସହିତ ହିତାଧିକାରୀମାନଙ୍କୁ ୨୯.୬୪ କୋଟି ଟଙ୍କାର ଋଣ ମଞ୍ଜୁରୀ ପତ୍ର ବଣ୍ଟନ କରିଥିଲେ। କାର୍ଯ୍ୟକ୍ରମରେ ନାବାର୍ଡ ଭୁବନେଶ୍ୱର କାର୍ଯ୍ୟାଳୟର ମୁଖ୍ୟ ମହାପ୍ରବନ୍ଧକ ଡ. ସୁଧାଂଶୁ ମିଶ୍ର ଯୋଗ ଦେଇ ମହିଳାମାନଙ୍କ ବିକାଶ ହେଲେ ଗ୍ରାମାଞ୍ଚଳର ପ୍ରକୃତ ବିକାଶ ସମ୍ଭବ ହେବ ବୋଲି କହିଥିଲେ।
ଅନ୍ୟମାନଙ୍କ ମଧ୍ୟରେ ନାବାର୍ଡ ସିଜିଏମ୍ ଏସ୍ କେ ତାଲୁକଦାର, ଓଡ଼ିଶା ଗ୍ରାମ୍ୟ ବ୍ୟାଙ୍କ ଚେୟାରମେନ ରିଷି ସିଂ, କଟକ କେନ୍ଦ୍ର ସମବାୟ ବ୍ୟାଙ୍କ ସମ୍ପାଦକ ଅନନ୍ତ କୁମାର ସାମଲ ଓ ନାବାର୍ଡ ଏଜିଏମ୍ ଅନାମିକା ପଣ୍ଡା ପ୍ରମୁଖ ଅତିଥି ଭାବେ ଯୋଗ ଦେଇଥିଲେ। କାର୍ଯ୍ୟକ୍ରମରେ କଟକ ଜିଲ୍ଲାର ବିଭିନ୍ନ ବ୍ଲକର ସ୍ଵୟଂ ସହାୟକ ଗୋଷ୍ଠୀ, କିଷାନ କ୍ରେଡିଟ କାର୍ଡଧାରୀ କୃଷକ ଏବଂ ବିଭିନ୍ନ ଋଣ ହିତାଧିକାରୀମାନେ ଯୋଗ ଦେଇ ଋଣ ମଞ୍ଜୁରି ପତ୍ର ଗ୍ରହଣ କରିଥିଲେ। ଓଜିବି ପକ୍ଷରୁ ୨୬.୭୭ କୋଟି, କଟକ ସିସିବି ପକ୍ଷରୁ ୨.୫୨ କୋଟି ଓ ବାଙ୍କି ସିସି ତରଫରୁ ୦.୩୫ କୋଟି ଟଙ୍କା ଋଣ ମଞ୍ଜୁର କରାଯାଇଥିଲା। ପ୍ରାରମ୍ଭରେ ସିଏଫ୍ଏଲ୍ ବାରଙ୍ଗ କଣ୍ଟାପଡ଼ା ପକ୍ଷରୁ ମା’ ମାନଙ୍କ ମଧ୍ୟରେ ଆର୍ଥିକ ଅନ୍ତର୍ଭୁକ୍ତ ସମ୍ପର୍କରେ ଏକ ସଚେତନତା କର୍ମଶାଳା ହୋଇଥିଲା।
କାର୍ଯ୍ୟକ୍ରମକୁ ଓଡ଼ିଶା ଗ୍ରାମ୍ୟ ବ୍ୟାଙ୍କ ଶାଖା ପରିଚାଳକ, ପରିଚାଳିକା, କେନ୍ଦ୍ର ସମବାୟ ବ୍ୟାଙ୍କ୍ ଶାଖା ଅଧିକାରୀ, ନିଗମ ସଂଗଠନର ସମ୍ପାଦକ ସୁରେଶ କୁମାର ତ୍ରିପାଠୀ ଓ ଅନ୍ୟ ପଦାଧିକାରୀମାନେ ପରିଚାଳନା କରିଥିଲେ। ନାବାର୍ଡ ସିଜିଏମ୍ ସମୀର ରଞ୍ଜନ ସାମନ୍ତରାୟ ଧନ୍ୟବାଦ ଦେଇଥିଲେ।
