କେନ୍ଦ୍ରାପଡ଼ା ,୨୯।୧: ୨୦୧୭ ତ୍ରିସ୍ତରୀୟ ପଞ୍ଚାୟତ ନିର୍ବାଚନକୁ ଇତିମଧ୍ୟରେ ୪ ବର୍ଷ ପୂରଣ ହୋଇଛି। ୨୦୨୨ରେ ଏହି ନିର୍ବାଚନ ଅନୁଷ୍ଠିତ ହେବା ପାଇଁ ସଜବାଜ ଚାଲିଛି। ହେଲେ କେନ୍ଦ୍ରାପଡ଼ା ଜିଲାର କେନ୍ଦ୍ରାପଡ଼ା ଓ ପଟ୍ଟାମୁଣ୍ଡାଇ ପୌର ନିର୍ବାଚନ ଦୀର୍ଘଦିନ ହେବ ବନ୍ଦ ରହିଛି। ଏହି ୨ ପୌରାଞ୍ଚଳକୁ ପରିଚାଳନା ପାଇଁ ରାଜ୍ୟ ସରକାର ପ୍ରଶାସକଙ୍କୁ ନିଯୁକ୍ତ କରିଛନ୍ତି। କାଉନ୍ସିଲରମାନେ ନ ଥିବାରୁ ଲୋକଙ୍କ ସମସ୍ୟାର ସମାଧାନ ହୋଇପାରୁ ନାହିଁ ବୋଲି ଅଭିଯୋଗ ହୋଇଛି। ପ୍ରଶାସକ ହାତଗଣତି କେତେଜଣ ପୂର୍ବତନ କାଉନ୍ସିଲରଙ୍କୁ ନେଇ କାମ ଚଳାଇଛନ୍ତି। ଫଳରେ ତୃଣମୂଳସ୍ତରର ସମସ୍ୟା ସମାଧାନ ହୋଇପାରୁ ନାହିଁ ବୋଲି ଅଭିଯୋଗ ହୋଇଛି।
ଆଗାମୀ ବିଧାନସଭାରେ ପୌର ନିର୍ବାଚନ ପାଇଁ ବାଟ ଖୋଲିବାର ସମ୍ଭାବନା ଅଛି। ଏଥିପାଇଁ ରାଜ୍ୟର ୩ ବୃହତ୍ ରାଜନୈତିକ ଦଳ କିଛି ମାତ୍ରାରେ ସକ୍ରିୟ ହୋଇଛନ୍ତି। ନିର୍ବାଚନମଣ୍ଡଳୀର ମୌଳିକ ସମସ୍ୟାଗୁଡ଼ିକ ପଦାକୁ ଆଣିବାକୁ ସବୁ ଦଳର ନେତାମାନେ ଏବେ ଅଣ୍ଟା ଭିଡିଛନ୍ତି। ସେହିପରି ବର୍ଷ ଆରମ୍ଭରୁ ସ୍ଥାନୀୟ ନେତାମାନେ ନିଜର ପୋଷ୍ଟର ଛପାଇ ଆଗାମୀ ଦିନର ନେତୃତ୍ୱ ପାଇଁ ସଜବାଜ ହୋଇଛନ୍ତି। ରାଜନୈତିକ ବିଶେଷଜ୍ଞ ଅମରବର ବିଶ୍ୱାଳ, ବାନାମ୍ବର ସାହୁ, ରାଧାକାନ୍ତ ମହାନ୍ତି ପ୍ରମୁଖ କହିଛନ୍ତି, ଜିଲାର ବିକାଶ ପାଇଁ ରାଜନେତା ଓ ପ୍ରଶାସକଙ୍କ ସମନ୍ବୟର ଆବଶ୍ୟକତା ଅଛି। ଦଳୀୟ କନ୍ଦଳ ରାଜନେତାଙ୍କ ମଧ୍ୟରେ ଏକାଠି ହେବାକୁ ସୁଯୋଗ ଦେଉ ନାହିଁ। ଏଣେ ପ୍ରଶାସକଙ୍କୁ ଏକାଧିକ ଦାୟିତ୍ୱ ଦିଆଯାଉଥିବାରୁ ବିଭିନ୍ନ ସମସ୍ୟାର ସମାଧାନ ହୋଇପାରୁନାହିଁ।
ରାଜ୍ୟ ସରକାରଙ୍କ ସର୍ଭେ ଅନୁଯାୟୀ, ଅର୍ଥନୈତିକ ବିକାଶ ଦିଗରେ କେନ୍ଦ୍ରାପଡ଼ା ଜିଲା ରାଜ୍ୟର ୨୬ତମ ସ୍ଥାନରେ ଅଛି। ଇନ୍ଦିରା ଆବାସ, କର୍ମନିଯୁକ୍ତି, ପଞ୍ଚାୟତ ଉନ୍ନୟନ, ବୃକ୍ଷରୋପଣ, ଜଳଶକ୍ତି ସଂରକ୍ଷଣ ଯୋଜନା ଆଦିରେ ଏହି ଜିଲା ରାଜ୍ୟର ୧୫ଶ ସ୍ଥାନରେ ପହଞ୍ଚତ୍ବା କଷ୍ଟକର ହୋଇପଡୁଛି। ସେହିପରି ଜିଲାରେ ମେଡିକାଲ କଲେଜ ସ୍ଥାପନ, ଶିଳ୍ପ କରିଡର, ପର୍ଯ୍ୟଟନ ଭିତ୍ତିଭୂମିର ବିକାଶ ଓ କୃଷି ପାଇଁ ସ୍ବତନ୍ତ୍ର ପ୍ୟାକେଜ୍ ଆବଶ୍ୟକତା ଥିବା ବେଳେ ରାଜନେତା ଓ ପ୍ରଶାସକଙ୍କ ସମନ୍ବୟ ଅଭାବ ଦେଖାଦେଇଛି। ଏହାଛଡା ତୃଣମୂଳସ୍ତରରେ ଶାସନ ବ୍ୟବସ୍ଥାର ସୁପରିଚାଳନା ପାଇଁ ପଟ୍ଟାମୁଣ୍ଡାଇ, ରାଜକନିକା, ମାର୍ଶାଘାଇରେ ସବ୍ଡିଭିଜନ ପ୍ରତିଷ୍ଠାର ସ୍ବର ଉଠିଛି। ସେନେଇ କୌଣସି ତପତ୍ରତା ପ୍ରକାଶ ପାଉନାହିଁ। ଗତ ନିର୍ବାଚନଗୁଡ଼ିକରେ ଜିତି ଏହି ଜିଲାରେ ବିଜେଡି ଏକ ଅପ୍ରତିଦ୍ୱନ୍ଦ୍ୱୀ ଦଳ ଭାବେ ଛିଡ଼ାହୋଇଛି। ରାଜ୍ୟରେ ବିଜେଡି ସରକାର ଚାଲିଥିଲେ ମଧ୍ୟ ସ୍ଥାନୀୟ ଲୋକ ପ୍ରତିନିଧି ଜିଲାର ବିକାଶ ପାଇଁ ଏକାଠି ହେବା ଦେଖାଯାଇ ନାହିଁ। ଏପରିକି ଏମ୍ପି ଓ ବିଧାୟକଙ୍କ ମଧ୍ୟରେ ସମନ୍ବୟର ଅଭାବ ରହିଛି। ଏହି ସମନ୍ବୟ ଅଭାବ ୩ ସାଧାରଣ ନିର୍ବାଚନ ପରେ ଦେଖିବାକୁ ମିଳିଛି।
ଲୋକଙ୍କ ସମସ୍ୟାର ସ୍ବର ଉଠାଇବାରେ ବିରୋଧୀ ଭାଜପା ଓ କଂଗ୍ରେସର ସ୍ଥିତି ମଧ୍ୟ ଏକା ପ୍ରକାର ରହିଛି। ଗତ ୨୨ ତାରିଖରେ କେନ୍ଦ୍ରାପଡ଼ାକୁ କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଆସିଥିଲେ। ତାଙ୍କ ଗସ୍ତ ସମୟରେ ଜିଲା ଭାଜପା ନେତୃମଣ୍ଡଳୀଙ୍କୁ ଏକାଠି ହୋଇଥିବା ଦେଖିବାକୁ ମିଳିଥିଲା। ଏହା ପୂର୍ବ ଓ ପରର କାର୍ଯ୍ୟକ୍ରମରେ ଦଳୀୟ କନ୍ଦଳ ସ୍ପଷ୍ଟ ହୋଇଛି। ସେହିପରି ଜିଲା କଂଗ୍ରେସ ସଭାପତି ଭାବେ ଅଂଶୁମାନ୍ ମହାନ୍ତି ଦାୟିତ୍ୱ ଗ୍ରହଣ ପରେ ଜିଲାର କର୍ମୀ ମହଲରେ ହଲଚଲ ଦେଖାଦେଇଛି। ସଂରକ୍ଷଣକୁ ନେଇ ଅଟକିଥିବା କେନ୍ଦ୍ରାପଡା ପୌର ନିର୍ବାଚନମଣ୍ଡଳୀର ପ୍ରତି ୱାର୍ଡକୁ ବିଧାୟକ ଶଶିଭୂଷଣ ବେହେରା ସର୍ଭେ କରିବା ସହ ଯୋଜନା ଅଟକଳ କରୁଛନ୍ତି। ସେହିପରି ରାଜନଗର ବିଧାୟକ ଧ୍ରୁବ ସାହୁ ପଟ୍ଟାମୁଣ୍ଡାଇ ପୌରାଞ୍ଚଳର ପ୍ରତ୍ୟେକ ୱାର୍ଡ ବୁଲୁଛନ୍ତି। ସାମୂହିକ ବିକାଶ ପାଇଁ ସେହି ଅଞ୍ଚଳର ରାଜନୈତିକ ବ୍ୟବସ୍ଥା ଅଧିକ ସକ୍ରିୟ ହେବା ଆବଶ୍ୟକ। ପ୍ରଶାସକଙ୍କ ସହ ସମନ୍ବୟ ରଖି କାର୍ଯ୍ୟ କଲେ ଜିଲାର ବିକାଶ ହୋଇପାରିବ ବୋଲି ରାଜନୈତିକ ବିଶେଷଜ୍ଞମାନେ ମତ ଦେଇଛନ୍ତି।
