ନୂଆଦିଲ୍ଲୀ : କିନ୍ନର ମାନଙ୍କ ପାଇଁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ସରକାର ଏକ ବଡ ନିଷ୍ପତ୍ତି ନେଇଛନ୍ତି। ଏହା ଦ୍ୱାରା କିନ୍ନରମାନେ ମାଗଣା ଲିଙ୍ଗ ପରିବର୍ତ୍ତନ ଅସ୍ତ୍ରୋପଚାର କରିବାକୁ ସମର୍ଥ ହେବେ। ସମ୍ପ୍ରତି ଦେଶର କୌଣସି ଡାକ୍ତରଖାନାରେ ଏହି ଅସ୍ତ୍ରୋପଚାର ମାଗଣା ନୁହେଁ। କେନ୍ଦ୍ର ସରକାର କିନ୍ନରଙ୍କୁ ଆୟୁଷ୍ମାନ ଭାରତ ଯୋଜନାର ଲାଭ ପ୍ରଦାନ କରିବାକୁ ଘୋଷଣା କରିଛନ୍ତି।
ଜାତୀୟ ସ୍ବାସ୍ଥ୍ୟ ପ୍ରାଧିକରଣ (ଏନଏଚଏ) ଏବଂ ସାମାଜିକ ନ୍ୟାୟ ଏବଂ ସଶକ୍ତିକରଣ ମନ୍ତ୍ରଣାଳୟ ମଧ୍ୟରେ ଏନେଇ ଏକ ଏମଓୟୁ ସୱାକ୍ଷରିତ ହୋଇଛି । କେନ୍ଦ୍ର ସ୍ବାସ୍ଥ୍ୟମନ୍ତ୍ରୀ ଡକ୍ଟର ମନସୁଖ ମାଣ୍ଡବ୍ୟ କହିଛନ୍ତି ଯେ ଆୟୁଷ୍ମାନ ଭାରତ ଯୋଜନା ଅଧୀନରେ କିନ୍ନରଙ୍କୁ ବାର୍ଷିକ ପାଞ୍ଚ ଲକ୍ଷ ଟଙ୍କା ପର୍ଯ୍ୟନ୍ତ ମାଗଣା ଚିକିତ୍ସା ସୁବିଧା ମିଳିବ। ଏହାର ଯୋଗ୍ୟତା ପାଇଁ କିନ୍ନର ସାର୍ଟିଫିକେଟ ବାଧ୍ୟତାମୂଳକ, ଯାହା ସରକାରଙ୍କ ଜାତୀୟ ପୋର୍ଟାଲ ଦ୍ୱାରା ପ୍ରଦାନ କରାଯାଇଛି। ନୂଆଦିଲ୍ଲୀର ଡକ୍ଟର ଆମ୍ବେଡକର ଅନ୍ତର୍ଜାତୀୟ କେନ୍ଦ୍ରରେ ଆୟୋଜିତ ଏହି କାର୍ଯ୍ୟକ୍ରମରେ ଡକ୍ଟର ମାଣ୍ଡବ୍ୟ କହିଛନ୍ତି ଯେ ଆୟୁଷ୍ମାନ ଯୋଜନା ପରିବାର ପାଇଁ କିନ୍ତୁ ଏହି କିନ୍ନର ସମାଜ ପରିବାର ସହ ଜଡିତ ନୁହନ୍ତି। ସେଥିପାଇଁ କିନ୍ନର ସମାଜକୁ ପାଞ୍ଚ ଲକ୍ଷ ବୀମା ଯୋଗାଇବା ପାଇଁ ଆମେ ପରିବାରର ସଂଜ୍ଞା ପରିବର୍ତ୍ତନ କରିଛୁ। ଦେଶରେ ୪.୮୦ ଲକ୍ଷ କିନ୍ନର ପଞ୍ଜିକୃତ ହୋଇଛନ୍ତି।
ଏନଏଚଏ ସିଇଓ ଡକ୍ଟର ଆର.ଏସ ଶର୍ମା ସୂଚନା ଦେଇଛନ୍ତି ଯେ ଆୟୁଷ୍ମାନ ଭାରତର ୧୨୦୦ରୁ ଅଧିକ ପ୍ୟାକେଜର ଲାଭ କିନ୍ନର ପାଇବ। ଏହା ସହିତ ସେମାନେ ଲିଙ୍ଗ ପରିବର୍ତ୍ତନ କରିବାରେ ମଧ୍ୟ ସକ୍ଷମ ହେବେ। ଏହା ସହ ଜଡିତ ଏକ ସ୍ବାସ୍ଥ୍ୟ ପ୍ୟାକେଜ ଘୋଷଣା କରାଯିବ। ଏହା ଉପରେ କାର୍ଯ୍ୟ ଚାଲିଛି । ଆୟୁଷ୍ମାନ କାର୍ଡରେ ବ୍ରାଣ୍ଡିଂକୁ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ଦୀର୍ଘ ଦିନ ଧରି ବିବାଦ ଲାଗି ରହିଥିଲା, ଏହି କାରଣରୁ ମନ୍ତ୍ରଣାଳୟ ସମସ୍ତଙ୍କ ସହମତିରେ ଏହି ପରିବର୍ତ୍ତନ କରିବାକୁ ନିଷ୍ପତ୍ତି ନେଇଥିଲା। ଡକ୍ଟର ମାଣ୍ଡବ୍ୟ କହିଛନ୍ତି ଯେ ବର୍ତ୍ତମାନ ବ୍ରାଣ୍ଡିଂ କାର୍ଡରେ ଉଭୟ କେନ୍ଦ୍ରୀୟ ଏବଂ ରାଜ୍ୟ ଦୃଶ୍ୟମାନ ହେବ। ଏପର୍ଯ୍ୟନ୍ତ ୩୩ ଟି ରାଜ୍ୟ ମଧ୍ୟରୁ ୩୧ ଟି ଏଥିରେ ସହମତ ହୋଇଛନ୍ତି। ଏଥିମଧ୍ୟରୁ ୨୯ଟି ରାଜ୍ୟରେ ହିତାଧିକାରୀଙ୍କ କାର୍ଡରେ ପରିବର୍ତ୍ତନ କରାଯାଉଛି।
