ଭୁବନେଶ୍ୱର,୭/୧୨(ବ୍ୟୁରୋ):ଭୁବନେଶ୍ଵର ଉପକଣ୍ଠ ବାଳକାଟୀର ଝିଣ୍ଟିଶାସନ ତ୍ରାହି ଅଚ୍ୟୁତ ଆଶ୍ରମ ପ୍ରତିଷ୍ଠାତା ସୁରେନ୍ଦ୍ର ନାଥ ମିଶ୍ର ଓରଫ ସୁର ବାବାଙ୍କ ଦେହାନ୍ତ ହୋଇଯାଇଛି। ରବିବାର ରାତି ପ୍ରାୟ ୧୧ଟା ୧୫ରେ ଭୁବନେଶ୍ଵରର ଏକ ଘରୋଇ ହସ୍ପିଟାଲରେ ଚିକିତ୍ସାଧୀନ ଅବସ୍ଥାରେ ତାଙ୍କର ମୃତ୍ୟୁ ଘଟିଛି। ଅସୁସ୍ଥତା ଯୋଗୁ ସୁର ବାବା କିଛିଦିନ ହେଲା ହସ୍ପିଟାଲରେ ଚିକିତ୍ସିତ ହେଉଥିଲେ।ମୃତ୍ୟୁ ଖବର ପ୍ରକାଶ ପାଇବା ପରେ ତାଙ୍କ ବାସଭବନରେ ବିଭିନ୍ନ ପ୍ରାନ୍ତରୁ ଶିଷ୍ୟମାନେ ପହଞ୍ଚି ଶେଷ ଦର୍ଶନ କରିଥିଲେ। ଶେଷରେ ତାଙ୍କ ମରଶରୀରକୁ ଆଶ୍ରମ ପରିକ୍ରମା କରାଯିବା ପରେ ବାସଗୃହ ବାରିପଟେ ଥିବା ବିଶ୍ରାମସ୍ଥଳୀରେ ଶୋକାକୁଳ ପରିବେଶ ମଧ୍ୟରେ ସମାଧି ଦିଆଯାଇଥିଲା।
ସୂଚନାଯୋଗ୍ୟ, ୧୯୮୨ ମସିହାରେ ସୁର ବାବା ତ୍ରାହି ଅଚ୍ୟୁତ ଆଶ୍ରମ ପ୍ରତିଷ୍ଠା କରିଥିଲେ। ଏକ ପୋଥି ବଳରେ ଲୋକଙ୍କ ଅତୀତ, ଭବିଷ୍ୟତ ବିଷୟରେ ଅବଗତ କରାଇ ଅମାପ ସମ୍ପତ୍ତି ଅର୍ଜନ କରିଥିଲେ। ଆଶ୍ରମକୁ ରାଜ୍ୟ ଏବଂ ରାଜ୍ୟ ବାହାରୁ ଲୋକମାନେ ଆସୁଥିଲେ। ମାତ୍ର ୨୦୧୫ ଅଗଷ୍ଟ ୩୦ରେ ସବୂକିଛି ଓଲଟି ଯାଇଥିଲା। ଆଶ୍ରମରେ ବହୁ କେଳେଙ୍କରୀ ହେଉଥିବା ଅଭିଯୋଗରେ ଏହାର ପ୍ରତିଷ୍ଠାତା ସୁର ବାବାଙ୍କୁ ଗିରଫ କରାଯାଇଥିଲା। ଆଶ୍ରମ ନାଁରେ ଜମି ଜବରଦଖଲ, ସମ୍ପତ୍ତି ହଡ଼ପ, ବେଆଇନ ଭାବେ ଅସ୍ତ୍ରଶସ୍ତ୍ର ରଖିବା ଏବଂ ମହିଳାଙ୍କୁ ଯୌନ ନିର୍ଯାତନା ଦେବା ଆଦି ବିଭିନ୍ନ ଅଭିଯୋଗରେ ତାଙ୍କୁ ଗିରଫ କରାଯାଇଥିଲା। ଏହା ସହିତ ତାଙ୍କର ଦୁଇ ପୁଅ ତ୍ରିଲୋଚନ ଏବଂ ବିରଞ୍ଚିକୁ ମଧ୍ୟ ପୁଲିସ ଗିରଫ କରିଥିଲା।
ଆଶ୍ରମରେ ଚଢ଼ାଉବେଳେ ପୁଲିସ ୨ଟି ବନ୍ଧୁକ ସହିତ କିଛି ଗୁଳି ଜବତ କରିଥିଲା। କ୍ରାଇମବ୍ରାଞ୍ଚର ଅର୍ଥନୈତିକ ଅପରାଧ ଶାଖା(ଇଓଡବ୍ଲ୍ୟୁ) ପକ୍ଷରୁ ମଧ୍ୟ ସୁର ବାବାଙ୍କ ସମ୍ପତ୍ତି ଯାଞ୍ଚ କରାଯାଇଥିଲା। ସୁର ବାବାଙ୍କ କେଳେଙ୍କରୀ ରାଜ୍ୟରେ ଆଲୋଡ଼ନ ସୃଷ୍ଟି କରିଥିଲା। ୨୦୧୭ ନଭେମ୍ବର ୨୮ରେ ସୁର ବାବା ସୁପ୍ରିମକୋର୍ଟରୁ ଜାମିନ ପାଇ ଜେଲରୁ ମୁକୁଳିଥିଲେ।
