କଟକ,୫।୬: ମହାମାରୀ କୋଭିଡ୍ ଏବଂ ରାଜ୍ୟରେ ଲକ୍ଡାଉନ୍ ଓ ଶଟ୍ଡାଉନ୍କୁ ଦୃଷ୍ଟିରେ ରଖି ଆସନ୍ତା ୭ ତାରିଖରୁ କେତେକ କଟକଣା ମଧ୍ୟରେ ଚାଲିବ ହାଇକୋର୍ଟ କାର୍ଯ୍ୟ। ଓଡ଼ିଶା ହାଇକୋର୍ଟ ରେଜିଷ୍ଟ୍ରାର (ଜୁଡିସିଆଲ)ଙ୍କ ସୂଚନା ମୁତାବକ ଏହି କଟକଣା ଆସନ୍ତା ଜୁଲାଇ ୨ ଯାଏ ବଳବତ୍ତର ରହିବ। ତଦନୁଯାୟୀ ପ୍ରତ୍ୟେକ କାର୍ଯ୍ୟଦିବସରେ ପୂର୍ବାହ୍ନ ସାଢ଼େ ୧୦ଟାରୁ ଗୋଟିଏ ଡିଭିଜନ ବେଞ୍ଚ ଏବଂ ୬ଟି ଏକକ ବେଞ୍ଚ ଭିଡିଓ କନଫରେନ୍ସରେ ଶୁଣାଣି କରିବେ। ଆସିଷ୍ଟାଣ୍ଟ ରେଜିଷ୍ଟ୍ରାର ଏବଂ ତଦୂର୍ଦ୍ଧ୍ୱ ପଦବୀରେ ଥିବା ଅଫିସରଙ୍କ ବ୍ୟତୀତ ୫୦% କର୍ମଚାରୀରେ ହାଇକୋର୍ଟ ଅଫିସ୍ କାର୍ଯ୍ୟ ଚାଲିବ। ଯେଉଁ କର୍ମଚାରୀମାନେ କାର୍ଯ୍ୟରେ ଯୋଗଦେବେ, ସେମାନେ ନିଜର ପରିଚୟପତ୍ର ଅଫିସ୍ ସମୟରେ ପିନ୍ଧିବେ। ଅଫିସର ଏବଂ କର୍ମଚାରୀଙ୍କ ବ୍ୟତୀତ ଅନ୍ୟ କାହାରିକୁ ହାଇକୋର୍ଟ କ୍ୟାମ୍ପସ୍ରେ ପ୍ରବେଶ ଅନୁମତି ଦିଆଯାଇନାହଁି। ତ୍ରୁଟି ଦୂର କରିବାର ସୀମିତ ଉଦ୍ଦେଶ୍ୟରେ ଆଡ୍ଭୋକେଟ୍ମାନେ ହାଇକୋର୍ଟ ଆସିପାରନ୍ତି। ପୂର୍ବାହ୍ନ ସାଢ଼େ ୧୦ଟାରୁ ମଧ୍ୟାହ୍ନ ସାଢ଼େ ୧୨ଟା ସୁଦ୍ଧା କପିଂ ସେକ୍ସନ କାଉଣ୍ଟର ନିକଟରେ ଥିବା ଡ୍ରପ୍ ବକ୍ସରେ କେସ୍ ଓ ଡକ୍ୟୁମେଣ୍ଟ ଦାଖଲ କରାଯାଇପାରିବ। ନଚେତ୍ ଏଥିପାଇଁ ଇ-ମେଲ୍ efiling.od-hc@gov.in ଏବଂ ଇ-ଫାଇଲିଂ ପୋର୍ଟାଲକୁ ବ୍ୟବହାର କରାଯାଇପାରିବ। ମାମଲାଗୁଡ଼ିକର ସୂଚୀବଦ୍ଧ ପାଇଁ ପୂର୍ବାହ୍ନ ୧୧ଟାରୁ ମଧ୍ୟାହ୍ନ ୧୨ଟା ମଧ୍ୟରେ ଡ୍ରପ୍ ବକ୍ସରେ ‘ମେନ୍ସନ ମେମୋ’ ଉଲ୍ଲେଖ କରି ଦାଖଲ କରାଯାଇପରିବ। ଜରୁରୀ ପ୍ରସଙ୍ଗରେ ମୌଖିକ ଭାବେ ଉଲ୍ଲେଖ କରାଯିବା ଆବଶ୍ୟକ ଅନୁଭବ ହେଲେ ଏହି ୧ ଘଣ୍ଟା ସମୟ ମଧ୍ୟରେ ରେଜିଷ୍ଟ୍ରାର୍ (ଜୁଡିସିଆଲ) ଏବଂ ଡେପୁଟି ରେଜିଷ୍ଟ୍ରାର୍ (ଜୁଡିସିଆଲ)ଙ୍କୁ ଭିଡିଓ କନଫରେନ୍ସ ମାଧ୍ୟମରେ ଜଣାଯାଇପାରିବ। ଲ’ଜିମା କୋର୍ଟଗୁଡ଼ିକର କାର୍ଯ୍ୟ ବାତିଲ ଜାରି ରହିବ। ସେହିପରି ଓଡ଼ିଶା ଷ୍ଟେଟ୍ ବାର୍ କାଉନ୍ସିଲ ପରିସରସ୍ଥ ଭିଡିଓ କନଫରେନ୍ସ କ୍ୟାବିନ ମଧ୍ୟ ବନ୍ଦ ରହିବ।
