ଭୁବନେଶ୍ୱର,୪/୬ ସରକାରୀ ଜାଗାକୁ ନିଜ ନାମରେ ଥିବା ଦେଖାଇ ୩ ଲକ୍ଷ ଟଙ୍କା ଠକି ନେଇଛନ୍ତି ବୋଲି ଇନଫୋସିଟି ଥାନାରେ ଅଭିଯୋଗ କରିଛନ୍ତି ମୈତ୍ରୀ ବିହାର ଅଳର ଉମାକାନ୍ତ ଜେନା । ପୁଲିସ ଏତଲା ଗ୍ରହଣ କରି ଘଟଣାର ତଦନ୍ତ ଆରମ୍ଭ କରିଛି । ପଥରଗାଡିଆ ଅଳର ରତନ ମିଶ୍ର ନାମକ ଜଣେ ବ୍ୟକ୍ତି ଉମାକାନ୍ତଙ୍କ ପାଖକୁ ଆସି କହିଥିଲେ ଯେ ତାଙ୍କର କିସ୍ ରାସ୍ତାରୁ ପଥର ଗାଡିଆ ମଧ୍ୟରେ ଏକ ଜାଗା ଅଛି । ବହୁତ ଅସୁବିଧା ଥିବାରୁ ସେ ଏହାକୁ ବିକି ଦେବେ । ଉମାକାନ୍ତ ଜାଗାର କାଗଜପତ୍ର ମାଗିବା ସହିତ ପତ୍ନୀଙ୍କୁ ଧରି ଜାଗା ଦେଖିବା ପାଇଁ ଯାଇଥିଲେ । ସେଠାରେ କାଗଜପତ୍ର ଦେଖି ରତନ ମିଶ୍ରଙ୍କ ନାମରେ ଜାଗାଟି ରହି ଥିବାର ଜାଣିବାକୁ ପାଇଥିଲେ । ଉଭୟଙ୍କ ମଧ୍ୟରେ ମୂଲଚାଲ ହୋଇ ଜାଗାର ଦର ଛିଡିଥିଲା । ଉମାକାନ୍ତ ଫୋନ୍ ପେ ମାଧ୍ୟମରେ ଅଗ୍ରୀମ ବାବଦକୁ ୩ ଲକ୍ଷ ଟଙ୍କା ଦେଇଥିଲେ । ଏହା ପରେ କାଗଜପତ୍ର ଆଣି ଯାଞ୍ଚ କଲା ବେଳକୁ ଜାଣିବାକୁ ପାଇଥିଲେ ଉକ୍ତ ଜମିଟି ଓଡିଶା ସରକାରଙ୍କ ସମ୍ପି ଅଟେ । ଏ ବାବଦରେ ରତନଙ୍କୁ କହିବାରୁ ରତନ ଆଉ ଧରାଛୁଆଁ ଦେଇ ନଥିଲେ କି ଫୋନ ଉଠାଇ ନଥିଲେ । ଅନ୍ୟ କିଛି ଉପାୟ ନପାଇ ନ୍ୟାୟ ପାଇଁ ଇନଫୋସିଟି ଥାନାର ଦ୍ୱାରସ୍ଥ ହୋଇଛନ୍ତି ବୋଲି ଉମାକାନ୍ତ କହିଛନ୍ତି । ଆଜି ତାଙ୍କ ସହିତ ତାଙ୍କ ପତ୍ନୀ ମଧ୍ୟ ଉପସ୍ଥିତ ଥିଲେ ।
