ତାଇପେଇ.୪।୮: ଆମେରିକାର ପ୍ରତିନିଧି ସ୍ପିକର ନାନ୍ସି ପେଲୋସିଙ୍କ ତାଇୱାନ ଗସ୍ତ ପରେ ଚାଇନା ଉତ୍ତ୍ୟକ୍ତ ହୋଇପଡିଛି। ଗୁରୁବାର ତାଇୱାନ ସୀମାର ବିଭିନ୍ନ ସ୍ଥାନରେ ଚାଇନା ସମରାଭ୍ୟାସ କରିବା ସହ ବାଲିଷ୍ଟିକ କ୍ଷେପଣାସ୍ତ୍ର ମାଡ଼ କରିଛି। ତାଇୱାନର ଉତ୍ତର-ପୂର୍ବ ଏବଂ ଦକ୍ଷିଣ-ପଶ୍ଚିମ ଦିଗରେ ଏହି କ୍ଷେପଣାସ୍ତ୍ର ମାଡ଼ ହୋଇଥିବା ଜଣାପଡିଛି। ଏହାକୁ ତାଇୱାନର ବର୍ହିବ୍ୟାପାର ମନ୍ତ୍ରଣାଳୟ ନିନ୍ଦା କରିବା ସହ ତାଇୱାନର ଜାତୀୟ ସୁରକ୍ଷା ପ୍ରତି ବିପଦ ସୃଷ୍ଟି ହୋଇଥିବା ପ୍ରକାଶ କରିଛି। ପ୍ରାୟ ୨ ଘଣ୍ଟା ମଧ୍ୟରେ ଚାଇନା ୧୧ଟି କ୍ଷେପଣାସ୍ତ୍ର ମାଡ଼ କରିଥିବା ତାଇଓ୍ବାନ ପକ୍ଷରୁ କୁହାଯାଇଛି। ଏପରି କି ଚାଇନା ପକ୍ଷରୁ ମାଡ଼ କରାଯାଇଥିବା କେତେକ କ୍ଷେପଣାସ୍ତ୍ର ଜାପାନର ଦକ୍ଷିଣପ୍ରାନ୍ତରେ ଥିବା ଏକ ସ୍ବତନ୍ତ୍ର ଜୋନରେ ମାଡ଼ ହୋଇଥିବା ଜାପାନର ପ୍ରତିରକ୍ଷା ମନ୍ତ୍ରୀ ନୋବୁ କିଶି କହିଛନ୍ତି। ଏହାକୁ ନେଇ ଜାପାନ କୂଟନୀତିକସ୍ତରରେ ଚାଇନା ସହ ଯୋଗାଯୋଗ କରିଛି।
ଅନ୍ୟପକ୍ଷେ ଚାଇନା ନିଜର ପ୍ରତିକ୍ରିୟା ରଖିଛି। ଗୁରୁବାର ସାମରିକ ଅଭ୍ୟାସର ଅଂଶ ଭାବେ ତାଇୱାନର ତଟବର୍ତ୍ତି ଅଞ୍ଚଳରେ ବାଲାଷ୍ଟିକ କ୍ଷେପଣାସ୍ତ୍ର ନିକ୍ଷେପ କରାଯାଇଛି। ଚାଇନାର ଇଷ୍ଟର୍ନ ଥିଏଟର କମାଣ୍ଡ ନିୟୋଜିତ ସାମରିକ ଅଭ୍ୟାସ ଭାବେ ତାଇୱାନର ପୂର୍ବ ଉପକୂଳବର୍ତ୍ତୀ ସମୁଦ୍ରରେ ପାରମ୍ପରିକ କ୍ଷେପଣାସ୍ତ୍ର ପ୍ରୟୋଗ କରିଛି। ଫାୟାରିଂ ଅଭ୍ୟାସ ଶେଷ ହେବା ପରେ ସମ୍ପୃକ୍ତ ସାମୁଦ୍ରିକ ତଥା ବାୟୁସେନା ଉପରୁ ନିୟନ୍ତ୍ରଣ ପ୍ରତ୍ୟାହାର କରି ନିଆଯାଇଛି।
