ଭୁବନେଶ୍ୱର,୭।୪(ବ୍ୟୁରୋ): ଭୁବନେଶ୍ୱର ମହାନଗର ନିଗମ(ବିଏମ୍ସି) ନିର୍ବାଚନରେ ବିଜେଡି ଭଲ ପ୍ରଦର୍ଶନ କରିଥିବା ବେଳେ ଏବେ ଡେପୁଟି ମେୟର ନିର୍ବାଚନ ନେଇ ଚର୍ଚ୍ଚା ଜୋର୍ ଧରିବାରେ ଲାଗିଛି। ଶାସକ ଦଳ ୬୭ଟି କର୍ପୋରେଟର ଆସନ ମଧ୍ୟରୁ ୪୮ଟି ନିଜ ଅକ୍ତିଆରକୁ ନେଇଥିବା ବେଳେ ଭାଜପା ଖାତାକୁ ୧୦ ଏବଂ ସ୍ବାଧୀନ ୯ଜଣ ପ୍ରାର୍ଥୀ ବିଜୟୀ ହୋଇଥିଲେ। ହେଲେ କେତେଜଣ ସ୍ବାଧୀନ ପ୍ରାର୍ଥୀ ଏବେ ବିଜେଡିରେ ଯୋଗ ଦେଇ ସାରିଥିବା ବେଳେ ଶୁକ୍ରବାର ସୁଦ୍ଧା ଆଉ କେତେଜଣଙ୍କୁ ଦଳରେ ମିଶାଇବା ଲାଗି ଜୋର୍ଦାର ଉଦ୍ୟମ ଆରମ୍ଭ ହୋଇଯାଇଛି। ଶନିବାର ଡେପୁଟି ମେୟର ପଦବୀ ଲାଗି ଭୋଟ୍ ହେବ। ତେବେ ଦଳ କାହାକୁ ସେହି ପଦବୀରେ ବସାଇବ ତାକୁ ନେଇ ଏହା ଭିତରେ ଦୁଇଥର ମୁଖ୍ୟମନ୍ତ୍ରୀଙ୍କ ଅଭିଯୋଗ ପ୍ରକୋଷ୍ଠରେ ବୈଠକ ବସି ସାରିଲାଣି। ଆଶାୟୀମାନେ ଡେପୁଟି ମେୟର ହେବା ଲାଗି ନେତାଙ୍କ ପାଖରେ ନିଜ ନିଜର ଲବି ଆରମ୍ଭ କରିଦେଇଛନ୍ତି। ତେବେ ଦଳ ସେମାନଙ୍କ ମଧ୍ୟରୁ କେଉଁ ଜଣଙ୍କୁ ପ୍ରାର୍ଥୀ କରିବ ତାହା ସମସ୍ୟାର କାରଣ ପାଲଟିଛି। ଭୁବନେଶ୍ୱରରେ ଆସୁଥିବା ୩ ବିଧାୟକଙ୍କ ମତାମତ ଏପର୍ଯ୍ୟନ୍ତ ଲୋଡା ଯାଇ ନ ଥିବା ଜଣାପଡିଥିଲେ ମଧ୍ୟ ବିଭିନ୍ନ ପର୍ଯ୍ୟାୟରେ ସେମାନଙ୍କ ସହ ଆଲୋଚନା ଚାଲିଥିବା କୁହାଯାଉଛି। ଅନ୍ୟପଟେ ବିଗତ ବର୍ଷଗୁଡିକ ଭଳି ଏଥର କୌଣସି ବାହାର ନେତାଙ୍କୁ କର୍ପୋରେଟର ଟିକେଟ ବାଣ୍ଟିବା କିମ୍ବା ସେମାନଙ୍କ କଥାକୁ ଗୁରୁତ୍ୱ ଦିଆଯାଇ ନାହିଁ। କେବଳ ସ୍ଥାନୀୟ ବିଧାୟକଙ୍କ ନିଷ୍ପତ୍ତିରେ କର୍ପୋରେଟର ଟିକେଟ ବଣ୍ଟନ କରାଯିବା କଥାକୁ ଏଡାଇ ଦିଆଯାଇପାରିବ ନାହିଁ। ସେହିଭଳି ଡେପୁଟି ମେୟର ପଦବୀ ଲାଗି ସ୍ଥାନୀୟ ୩ ବିଧାୟକଙ୍କ ମତାମତ ଲୋଡାଯାଇପାରେ। ତେବେ ଦଳ ମୁଖ୍ୟ ଦୁଇ ଡେପୁଟି ମେୟର ଦାବିଦାର ଅମରେଶ ଜେନା ନା ବିରଞ୍ଚି ନାରାୟଣ ମହାସୁପକାରଙ୍କ ମଧ୍ୟରୁ କାହାକୁ ପ୍ରାର୍ଥୀ କରିବ ସେଥି ଉପରେ ସମସ୍ତଙ୍କ ନଜର ରହିଛି। ତେବେ ଏହି ଦୁଇ ଜଣଙ୍କୁ ବାଦ୍ ଦେଇ ୩ୟ ବ୍ୟକ୍ତି କାହାକୁ ଦଳ ପ୍ରାର୍ଥୀ ଯେ ନ କରିବ ସେକଥା ବିଜେଡିରେ ଅସମ୍ଭବ ନୁହେଁ ବୋଲି ଜଣେ ବରିଷ୍ଠ ବିଧାୟକ ମତ ରଖିଛନ୍ତି। ଏହି ଦୌଡରେ ମିହିର ରାଉତ ପ୍ରେମାନନ୍ଦ ଜେନା, ପ୍ରୀତିନନ୍ଦା ରାଉତରାୟଙ୍କ ନାମ ରହିଛି। ହେଲେ ଉଭୟ ଅମରେଶ ଏବଂ ବିରଞ୍ଚି ଏକାଠି ସବୁ ବିଧାୟକଙ୍କ ଘରକୁ ଯାଇ ସେମାନେ ଦୁଇଜଣଙ୍କ ମଧ୍ୟରୁ କାହାକୁ ପ୍ରାର୍ଥୀ କରାଯାଉ ବୋଲି ମିଶିକି କହି ବୁଲୁଛନ୍ତି। ହେଲେ ଦଳର ନିଷ୍ପତ୍ତି କ’ଣ ହେବ ତା ଉପରେ ସମସ୍ତଙ୍କ ନଜର ରହିଛି।
