ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଆମ୍ ଆଦମି ପାର୍ଟି (ଆପ୍)ର ରାଷ୍ଟ୍ରୀୟ ଆବାହକ ଭାବରେ ରବିବାର ପୁନଃ ନିର୍ବାଚିତ ହୋଇଛନ୍ତି। କେଜରିୱାଲ କ୍ରମାଗତ ତୃତୀୟ ଥର ପାଇଁ ଏହି ପଦବୀକୁ ନିର୍ବାଚିତ ହୋଇଛନ୍ତି। ଦଳର ଜାତୀୟ କାର୍ଯ୍ୟକାରିଣୀ ବୈଠକ ଅବସରରେର କେଜରିୱାଲଙ୍କ ନାମକୁ ଏଥିପାଇଁ ଅନୁମୋଦନ କରାଯାଇଥିଲା। ଏହା ପୂର୍ବରୁ ୨୦୧୬ ଏପ୍ରିଲରେ ସେ ଦ୍ୱିତୀୟ ଥର ପାଇଁ ଆମ୍ ଆଦମି ପାର୍ଟିର ଆବାହକ ଭାବରେ ର୍ନିବାଚିତ ହୋଇଥିଲେ। ସେ ଏହି ପଦବୀରେ ୩ ବର୍ଷ ପାଇଁ କାର୍ଯ୍ୟ କରିଥିଲେ। ତେବେ ୨୦୧୯ ଲୋକସଭା ନିର୍ବାଚନ ଏବଂ ୨୦୨୦ରେ ଦିଲ୍ଲୀ ବିଧାନସଭା ନିର୍ବାଚନ କାରଣରୁ କେଜରିୱାଲଙ୍କର ଆବାହକ ଭାବରେ କାର୍ଯ୍ୟକାଳ ୨୦୨୦ ପର୍ଯ୍ୟନ୍ତ ବୃଦ୍ଧି କରାଯାଇଥିଲା। କିନ୍ତୁ କୋଭିଡ-୧୯ ମହାମାରୀ କାରଣରୁ ଦଳର ରାଷ୍ଟ୍ରୀୟ ପରିଷଦ ବୈଠକ ୨୦୨୦ରେ ଅନୁଷ୍ଠିତ ହୋଇପାରିଲା ନାହିଁ। ସେଥିପାଇଁ ଚଳିତ ବର୍ଷ ଜାନୁଆରୀର ଦଳର ରାଷ୍ଟ୍ରୀୟ ପରିଷଦ ବୈଠକ ବସି ଦଳୀୟ ସମ୍ବିଧାନ ସଂଶୋଧନ କରାଯାଇଥିଲା। ସେଥିରେ ଦଳର ରାଷ୍ଟ୍ରୀୟ ଆବାହକଙ୍କ କାର୍ଯ୍ୟକାଳ ୩ ବର୍ଷରୁ ୫ ବର୍ଷକୁ ବୃଦ୍ଧି କରାଯାଇଥିଲା।
