ଭୁବନେଶ୍ୱର,୧୯।୪(ବ୍ୟୁରୋ): ବହୁଚର୍ଚ୍ଚିତ ତପସ୍ବିନୀ ଦାଶ ଓ ଡାକ୍ତର ସୁମିତ ସାହୁଙ୍କ ବିବାଦ ସମାଧାନ ହୋଇନାହିଁ । କୋର୍ଟ ନିର୍ଦ୍ଦେଶ ପ୍ରକାରେ ତପସ୍ବିନୀଙ୍କୁ ସୁମିତ ମାସିକ ୧୦ ହଜାର ଟଙ୍କା ଭରଣ ପୋଷଣ ଦେଉଛନ୍ତି । ଜିଲା କୋର୍ଟ ନିର୍ଦ୍ଦେଶ ପ୍ରକାରେ ଫେବୃୟାରୀ ମାସରେ ପ୍ରଥମେ ୧୭ ହଜାର ଟଙ୍କା ପ୍ରଦାନ କରିଥିଲେ । ପରବର୍ତ୍ତୀ ସମୟରେ ହାଇକୋର୍ଟଙ୍କ ନିର୍ଦ୍ଦେଶ ପ୍ରକାରେ ସେ ଫେବୃୟାରୀ ଓ ମାର୍ଚ୍ଚରେ ୧୦ହଜାର ଟଙ୍କା ଲେଖାଏ ଦେଉଛନ୍ତି । ଏପ୍ରିଲ ୧୦ ଓ ୧୧ ଛୁଟି ଥିବାରୁ ସୁମିତ ତାଙ୍କ ଓକିଲ ସୁରେନ୍ଦ୍ର ବେହେରାଙ୍କ ଜରିଆରେ ୮ରେ ହିଁ ୧୦ ହଜାର ଟଙ୍କା ଡ୍ରାଫ୍ଟ ପ୍ରଦାନ କରିଛନ୍ତି । ତପସ୍ବିନୀ ହାଇକୋର୍ଟଙ୍କ ନିର୍ଦ୍ଦେଶକ୍ରମେ ମଧ୍ୟସ୍ଥତା କେନ୍ଦ୍ରରେ ହାଜର ହେଉଥିବାରୁ ଟଙ୍କା ନେବାକୁ କୋର୍ଟକୁ ଆସିପାରି ନ ଥିଲେ ।
ସୋମବାର ତପସ୍ବିନୀ ତାଙ୍କ ଓକିଲ ଦୀପକ ପଟ୍ଟନାୟକଙ୍କ ଉପସ୍ଥିତିରେ ଭରଣପୋଷଣ ୧୦ହଜାର ଟଙ୍କା ଡ୍ରାଫ୍ଟ ଏସ୍ଡିଜେଏମ କୋର୍ଟରୁ ନେଇଛନ୍ତି । ଦୁଇ ଦିନ ପୂର୍ବେ ସୁମିତ ସ୍ଥାନୀୟ ପରିବାର ଅଦାଲତରେ ହାଜର ହୋଇଥିବା ବେଳେ ତପସ୍ବିନୀ ଆସି ପାରି ନ ଥିଲେ । ବାରମ୍ବାର ପରିବାର ଅଦାଲତ ତାରିଖ ଧାର୍ଯ୍ୟ କରୁଥିଲେ ମଧ୍ୟ ତପସ୍ବିନୀ କୋର୍ଟଙ୍କ ଆଦେଶକୁ ଅବମାନନା କରୁଥିବା ନେଇ ସୁମିତଙ୍କ ଓକିଲ ସୁରେନ୍ଦ୍ର ବେହେରା କହିଥିଲେ। ଆସନ୍ତା ୧୨ତାରିଖରେ ପରିବାର ଅଦାଲତରେ ଉଭୟ ପକ୍ଷ ହାଜର ହେବା ପାଇଁ ନିର୍ଦ୍ଦେଶ ଦେଇଛନ୍ତି । ସେପଟେ ଉଭୟଙ୍କ ବିବାଦ ସମାଧାନ କରିବାକୁ ମଧ୍ୟସ୍ଥତା କେନ୍ଦ୍ରରେ ଆଲୋଚନା ଜାରି ରହିଛି ।
