ଭୁବନେଶ୍ୱର,୧୫/୫(ବ୍ୟୁରୋ): ଜଟଣୀ ବିଧାୟକ ସୁରେଶ କୁମାର ରାଉତରାୟ ଆଜି ଜଟଣୀ ବ୍ଲକ ଅନ୍ତର୍ଗତ ଅଙ୍ଗାରପଡ଼ା ପଞ୍ଚାୟତର ପାଣିଓରା ଗ୍ରାମରେ ଅଖିମୁଠି ଅନୁକୂଳ କରିଛନ୍ତି। ଏହି ପରିପ୍ରେକ୍ଷୀରେ ଶ୍ରୀ ରାଉତରାୟ କହିଛନ୍ତି ଯେ ଅକ୍ଷୟତୃତୀୟାରେ ଚାଷ କାର୍ଯ୍ୟର ଶୁଭାରମ୍ଭ ହେଉଥିବା ପାଇଁ ଏହି ଦିନଟି ଚାଷୀକୂଳ ପାଇଁ ଏକ ପବିତ୍ର ଦିନ ଭାବେ ଗ୍ରହଣ କରାଯାଏ। ସେଥିପାଇଁ ଚାଷୀପୁଅ କ୍ଷେତକୁ ଯାଇ ପୂଜାର୍ଚ୍ଚନା କରିବା ସହ ଏବର୍ଷ ଚାଷରେ ସଫଳ ହେବାପାଇଁ କାମନା କରିଥାଏ। ଏ ପରମ୍ପରା କାଳ କାଳ ଧରି ଚାଲୁ ରହିଛି। ଚାଷୀଭାଇ ଯିଏ ନିସ୍ୱାର୍ଥପର ସମଦାନ କରି ମଣିଷ ସମାଜକୁ ବଞ୍ଚାଇଥାଏ ଆଜି ସିଏ ନିଜର କର୍ମପ୍ରତି ନିବେଦିତ ହୋଇ ଚାଷ କାର୍ୟ୍ୟ ଆରମ୍ଭ କରେ।
ବିଶେଷ କରି ଆମ ରାଜ୍ୟର ପୁରପଲ୍ଲୀରେ ଧାନ କ୍ଷେତରେ ଆଜି ଚାଷୀଭାଇ ହଳ ଲଙ୍ଗଳ ଧରି ଜମିରେ ଚାଷ କରିବା ସହ ଭଲ ଫସଲ ପାଇଁ ଏକ ସଂକଳ୍ପ ନେଇଥାଏ। ଶ୍ରୀ ରାଉତରାୟ କହିଲେ ସେ ଜଣେ ଚାଷୀ ପରିବାରର ଲୋକ ଏବଂ ଆଜି ପର୍ଯ୍ୟନ୍ତ ନିଜ ଗାଁରେ ଚାଷ କାର୍ୟ୍ୟ ଜାରି ରଖିଛନ୍ତି। ପାଣିଓରା ଗ୍ରାମର ଅମୀୟ ରଞ୍ଜନ ସ୍ୱାଇଁଙ୍କ ଜମିରେ ଆଜି ଏହି କାର୍ୟ୍ୟକ୍ରମ ଅନୁଷ୍ଠିତ ହୋଇଥିଲା। ଏହି କାର୍ୟ୍ୟକ୍ରମରେ ଧନେଶ୍ୱର ରାଉତରାୟ, ଅମୀୟ ରଞ୍ଜନ ସ୍ୱାଇଁ, କାଳନ୍ଦି ମହାରଣା ଓ ସୁନିଲ ରାଉତରାୟ ପ୍ରମୁଖ ଅଂଶଗ୍ରହଣ କରିଥିଲେ।
