banner
Breaking

ବିସିସିଆଇ ପ୍ୟାନେଲରେ ଦୁଇ ଓଡିଆ ଖେଳାଳି।

0

ନୂଆଦିଲ୍ଲୀ, ୧୬ା୧୧- ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ(ବିସିସିଆଇ)ର ନ୍ୟାଶନାଲ ସିଲେକ୍ସନ ପ୍ୟାନେଲ ନୂଆରୂପ ନେବାକୁ ଯାଉଛି। ଖାଲି ପଡ଼ିଥିବା ପଦବୀଗୁଡ଼ିକ ଲାଗି ପୂର୍ବାଞ୍ଚଳରୁ ଓଡ଼ିଶାର ଶିବ ସୁନ୍ଦର ଦାସ, ଉତ୍ତରାଞ୍ଚଳରୁ ଚେତନ ଶର୍ମା ଓ ମନିନ୍ଦର ସିଂ ଏବଂ ପଶ୍ଚିମାଞ୍ଚଳରୁ ଅଜିତ ଅଗରକରଙ୍କ ଭଳି କେତେଜଣ ପୂର୍ବତନ ଭାରତୀୟ ଖେଳାଳି ସେମାନଙ୍କ ଜୋନ୍‌ରୁ ଆବେଦନ କରିଛନ୍ତି। ପୂର୍ବାଞ୍ଚଳରୁ ଆବେଦନ କରିଥିବା ପୂର୍ବତନ ଓପନର ଶିବ ସୁନ୍ଦର ଜଣେ ବିଶ୍ୱ ଶ୍ରେଣୀୟ କ୍ଲୋଜ୍‌-ଇନ୍‌ ଫିଲ୍ଡର ଥିଲେ। ୨୩ଟି ଟେଷ୍ଟ ମ୍ୟାଚରେ ସେ ୧୩୨୬ ରନ ସଂଗ୍ରହ କରିଛନ୍ତି। ପୂର୍ବାଞ୍ଚଳରୁ ସେ କ୍ଲିଅର ଫେଭରାଇଟ୍‌। ତେବେ ତାଙ୍କ ରାଜ୍ୟ ସାଥୀ ଖେଳାଳି ତଥା ଭାରତର ପୂର୍ବତନ ପେସ୍‌ ବୋଲର ଦେବାଶିଷ ମହାନ୍ତି ଜୁନିୟର ପ୍ୟାନେଲରେ ରହିଛନ୍ତି। ଜୁନିୟର ଓ ସିନିୟର ସିଲେକ୍ସନ କମିଟିରେ ଗୋଟିଏ ରାଜ୍ୟରୁ ୨ଜଣ ରହିବାକୁ ବିସିସିଆଇ ସମ୍ଭବତଃ ପସନ୍ଦ କରିବ ନାହିଁ। ଏକ୍ଷେତ୍ରରେ ବିସିସିଆଇ ଦେବାଶିଷଙ୍କୁ ଆସନ୍ତା ଦୁଇ ବର୍ଷ ପାଇଁ ସିନିୟର ସିଲେକ୍ଟର କରିବା ଯଥେଷ୍ଟ ସମ୍ଭାବନା ରହିଛି। ପୂର୍ବତନ ବେଙ୍ଗଲ ପେସ୍‌ ବୋଲର ରଣଦେବ ବୋଷ ପୂର୍ବାଞ୍ଚଳରୁ ଆବେଦନକାରୀଙ୍କ ମଧ୍ୟରେ ରହିଛନ୍ତି। ଯଦି ଶିବସୁନ୍ଦର ଓ ରଣଦେବଙ୍କ ପ୍ରାର୍ଥିତ୍ୱକୁ ଦେଖାଯାଏ ତେବେ ଓଡ଼ିଶା ଖେଳାଳି ଫେଭରାଇଟ ରହିବେ। ଯଦି ବିସିସିଆଇ ଦେବାଶିଷଙ୍କୁ ସିନିୟର ପ୍ୟାନେଲକୁ ନିଏ ତେବେ ରଣଦେବ ଜୁନିୟର ପ୍ୟାନେଲରେ ସ୍ଥାନ ପାଇବା ସମ୍ଭାବନା ରହିଛି ବୋଲି ଜଣେ ଅଫିସିଆଲ ନିଜ ନାମ ଗୋପନ ସର୍ତ୍ତରେ ପ୍ରକାଶ କରିଛନ୍ତି।
୨୩୧ ଅନ୍ତର୍ଜାତୀୟ ମ୍ୟାଚ୍‌ (୧୯୧ ଦିନିକିଆ, ୨୬ ଟେଷ୍ଟ ଏବଂ ୪ ଅନ୍ତର୍ଜାତୀୟ ଟି୨୦) ଖେଳିଥିବା ଅଜିତ୍‌ ଅଗରକର ସିଲେକ୍ସଟର ପାଇଁ ପୁନର୍ବାର ଆବେଦନ କରିବାକୁ ଥିବାରୁ ଚେୟାରମ୍ୟାନ ପଦବୀ ପାଇଁ ଦୌଡ଼ରେ ସେ ସବୁଠାରୁ ଆଗରେ ରହିବେ। ଅଗରକର ୩ ଅନ୍ତର୍ଜାତୀୟ ଦିନିକିଆ ବିଶ୍ୱକପ୍‌ ଏବଂ ୨୦୦୭ରେ ଗୋଟିଏ ଟି୨୦ ବିଶ୍ୱକପ୍‌ ଖେଳିଛନ୍ତି। ଅନ୍ତର୍ଜାତୀୟ କ୍ରିକେଟରେ ତାଙ୍କର ପ୍ରଚୁର ଅଭିଜ୍ଞତା ରହିଛି। ସେ ଆବେଦନ କରିବେ ବୋଲି ତାଙ୍କ ନିକଟତମ ମହଲରୁ ଶୁଣିବାକୁ ମିଳୁଛି। ଚେତନ ଚୌହାନଙ୍କର ୮୮ ଅନ୍ତର୍ଜାତୀୟ ଗେମ୍‌ର ଅଭିଜ୍ଞତା ରହିଛି। ୧୯୮୭ରେ ପ୍ରଥମ ଭାରତୀୟ ଖେଳାଳି ଭାବେ ଏକ ବିଶ୍ୱକପ୍‌ରେ ହ୍ୟାଟ୍ରିକ୍‌ ଅର୍ଜନ କରିଥିଲେ। ସୁନୀଲ ଗାଭାସ୍କର, କପିଳ ଦେବ, ଦିଲୀପ ଭେଙ୍ଗସରକାରଙ୍କ ଭଳି କିମ୍ବଦନ୍ତୀଙ୍କ ସହ ସେ ଖେଳିଛନ୍ତି। ପ୍ୟାନେଲର ଜଣେ ସାଧାରଣ ସଦସ୍ୟଭାବେ କାର୍ଯ୍ୟ କରିବାରେ ତାଙ୍କର କୌଣସି ଅସୁବିଧା ନାହିଁ। ଭାରତୀୟ କ୍ରିକେଟ ପାଇଁ କାର୍ଯ୍ୟକରିବା ତାଙ୍କର ମୂଳ ଲକ୍ଷ୍ୟ ବୋଲି ସେ କହିଛନ୍ତି। ୫୪ ବର୍ଷୀୟ ଏହି ପୂର୍ବତନ କ୍ରିକେଟର ଗତ ଜାନୁୟାରୀରେ ମଧ୍ୟ ଆବେଦନ କରିଥିଲେ। ମାତ୍ର ବିସିସିଆଇ ସେତେବେଳେ ଦକ୍ଷିଣାଞ୍ଚଳରୁ ଏମ୍‌.ଏସ୍‌.କେ ପ୍ରସାଦଙ୍କ ସ୍ଥାନରେ ସୁନୀଲ ଯୋଶି ଏବଂ ଗଗନ ଖୋଡ଼ାଙ୍କ ସ୍ଥାନରେ ସେଣ୍ଟ୍ରାଲ ଜୋନ୍‌ର ହରବିନ୍ଦର ସିଂଙ୍କୁ ନିଯୁକ୍ତି ଦେଇଥିଲା। ଉତ୍ତରାଞ୍ଚଳରୁ ଆବେଦନ କରିଥିବା ଅନ୍ୟ ଜଣେ ହେଲେ ପୂର୍ବତନ ବାମହାତୀ ସ୍ପିନର ମନିନ୍ଦର ସିଂ (୯୪ଗେମ୍‌, ୩୫ ଟେଷ୍ଟ ଏବଂ ୫୯ ଅନ୍ତର୍ଜାତୀୟ ଦିନିକିଆ)। ଅଶୀ ଦଶକରେ ମନିନ୍ଦରଙ୍କୁ ବିଶେନ ସିଂଙ୍କ ବିକଳ୍ପ ବିବେଚନା କରାଯାଉଥିଲା। ଉତ୍ତରାଞ୍ଚଳର ଜଣେ ବରିଷ୍ଠ ପ୍ରଶାସକ କହିଛନ୍ତି ସେମାନଙ୍କ ଅଞ୍ଚଳରୁ ଦୁଇ ପ୍ରତିଷ୍ଠିତ ପୂର୍ବତନ କ୍ରିକେଟର ମନିନ୍ଦର ଓ ଚେତନ ଆବେଦନ କରିବା ସ୍ବାଗତଯୋଗ୍ୟ। ଗତଥର ସରଣଦୀପ ସିଂ ଏହି ଜୋନରୁ ପ୍ରତିନିଧିତ୍ୱ କରିଥିଲେ, ଯାହାଙ୍କର ୧୦ ଅନ୍ତର୍ଜାତୀୟ ଗେମ୍‌ରୁ କମ୍‌ ଅଭିଜ୍ଞତା ରହିଥିଲା।

Khansweb Solution Bhubaneswar

Leave A Reply

Your email address will not be published.