banner
Breaking

ଭୁବନେଶ୍ୱରରେ ଟିକାକରଣ ପାଇଁ ସ୍ବତନ୍ତ୍ର ବ୍ୟବସ୍ଥା କଲା ବିଏମସି।

0

ଭୁବନେଶ୍ୱର, ୧୧।୫ (ବ୍ୟୁରୋ): ରାଜଧାନୀ ଭୁବନେଶ୍ୱରରେ କରୋନା ସଂକ୍ରମିତ ହାର ଦିନକୁ ଦିନ ବଢି ଚାଲିଥିବାବେଳେ ଭୁବନେଶ୍ୱର ମହାନଗର ନିଗମ (ବିଏମ୍‌ସି) ପକ୍ଷରୁ ଟିକାକରଣକୁ ତ୍ୱରାନ୍ବିତ କରାଯାଇଛି। ଗତ ୮ତାରିଖରୁ ଦ୍ୱିତୀୟ ଡୋଜ୍‌ ଟିକାକରଣ ପାଇଁ ବିଏମ୍‌ସି ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଥିଲା। ରସୁଲଗଡସ୍ଥିତ ଏସ୍‌ପ୍ଲାନେଡ୍‌ ମଲର ପାର୍କିଂସ୍ଥଳରେ ଗାଡ଼ି ଭିତରେ (ଡ୍ରାଇଭ୍‌  ଇନ୍‌ ଭ୍ୟାକ୍ସିନେଶନ ) ହିତାଧିକାରୀଙ୍କୁ ଦ୍ୱିତୀୟ ଡୋଜ୍‌ ଟିକା ଦିଆଯାଇଥିଲା। ତେବେ ଏସ୍‌ପ୍ଲାନେଡ୍‌ ମଲ୍‌ ପରି ଆଉ ୩ଟି ସ୍ଥାନରେ ଯଥା କଳ୍ପନା ଛକସ୍ଥିତ ଉତ୍କଳ କନିକା ଗ୍ୟାଲେରୀଆ ମଲ ପାର୍କିଂସ୍ଥଳ, ରୁଦ୍ରପୁରସ୍ଥିତ ସିମ୍ଫୋନି ମଲ୍‌ ପାର୍କିଂସ୍ଥଳ ଓ ପଟିଆସ୍ଥିତ କିଟ୍‌ ୟୁନିଭର୍ସିଟିର କ୍ରିକେଟ୍‌ ଷ୍ଟାଡିୟମ୍‌ରେ ବିଏମ୍‌ସର ଭ୍ୟାକ୍ସିନ ଇନ୍‌ ଡ୍ରାଇଭ୍‌ କରାଯିବ ବୋଲି ସୋମବାର ବିଏମ୍‌ସି କମିଶନର ପ୍ରେମଚନ୍ଦ୍ର ଚୌଧାରୀ ସୂଚନା ଦେଇଛନ୍ତି। ଏଠାରେ ୪୫ବର୍ଷରୁ ଉର୍ଦ୍ଧ୍ୱ ବ୍ୟକ୍ତିମାନେ ଦ୍ୱତୀୟ ଡୋଜ୍‌ ଟିକା ନେଇପାରିବେ। ଦିନକୁ ପ୍ରତ୍ୟେକ ସ୍ଥାନରେ ୩ଶହ ଲେଖାଏଁ ସ୍ଲଟ ବୁକିଂ ଧାର୍ଯ୍ୟ କରାଯାଇଥିବାବେଳେ ମଙ୍ଗଳବାରଠାରୁ ଆସନ୍ତା ୧୫ତାରିଖ ୫ଦିନ ପର୍ଯ୍ୟନ୍ତ ଏହି ଟିକାକରଣ ହେବ। ଏନେଇ https:/selfregistration.cowin.gov.in/ରେ ସୋମବାର ସନ୍ଧ୍ୟା ୬ଟାରୁ ବୁକିଂ ଆରମ୍ଭ କରାଯାଇଥିଲା। ଟିକାକରଣ ସ୍ଥାନକୁ କେବଳ ସ୍ଲଟ ବୁକିଂ କରିଥିବା ବ୍ୟକ୍ତିଙ୍କୁ ନିଜ ସଙ୍ଗରେ ପ୍ରଥମ ଡୋଜ୍‌ ଟିକାକରଣର ସାର୍ଟିଫିକେଟ ନେଇ ଆସିବାକୁ ଅନୁମତି ଦିଆଯାଇଛି। ସେହିପରି ଗାଡ଼ିରେ ରହି ଟିକା ନେବା ପରେ ୩୦ ମିନିଟ୍‌ ପର୍ଯ୍ୟନ୍ତ ଅବ୍‌ଜରଭେଶନ୍‌ ପାଇଁ ଓ୍ବେଟିଂ ଏରିଆରେ ରହିବାକୁ କୁହାଯାଇଛି। ରାଜଧାନୀରେ ଘରୋଇ ହସ୍ପିଟାଲରେ ଟିକାଦାନ ପାଇଁ ପୂର୍ବରୁ ୩୧ଟି ବେସରକାରୀ ହସ୍ପିଟାଲକୁ ପ୍ରଥମ ଫେଜ୍‌ରେ ଚିହ୍ନଟ କରାଯାଇଥିଲା। ମାତ୍ର ବର୍ତ୍ତମାନ ପର୍ଯ୍ୟନ୍ତ କୌଣସି ଘରୋଇ ହସ୍ପିଟାଲକୁ ଟିକା ଦିଆଯାଇନାହିଁ। ଟିକା ଆସିଲେ ଘରୋଇ ହସ୍ପିଟାଲରେ ଟିକା ଦିଆଯିବ ବୋଲି ସେ କହିଛନ୍ତି। ଗତ ୧ ତାରିଖରୁ ମହାନଗର ଅଞ୍ଚଳରେ ୧୮ରୁ ୪୪ ବର୍ଷ ବର୍ଗର ହିତାଧିକାରୀମାନଙ୍କୁ ଟିକାକରଣ ଆରମ୍ଭ କରାଯାଇଛି। ଏହି ବର୍ଗର ହିତାଧିକାରୀଙ୍କ ପାଇଁ ଦେଢ ଲକ୍ଷ ଟିକା ଆସିଥିଲା। ବିଏମ୍‌ସି ପକ୍ଷରୁ ଆସନ୍ତା ୧୯ ତାରିଖ ପର୍ଯ୍ୟନ୍ତ ସମସ୍ତ ସ୍ଲଟ୍‌ ବୁକିଂ ସରିଛି। ତେଣୁ ବୁକିଂ କ୍ୟାନ୍‌ସେଲ କରାଯାଇପାରିବ ନାହିଁ। ତେଣୁ ନୂଆ ଭ୍ୟାକ୍ସିନ ଆସିଲେ ଘରୋଇ ହସ୍ପିଟାଲକୁ ଦେବାର ବ୍ୟବସ୍ଥା କରାଯିବ। ଏଯାବତ୍‌ ମହାନଗର ଅଞ୍ଚଳରେ ପ୍ରାୟ ୫ଲକ୍ଷ ହିତାଧିକାରୀ ପ୍ରଥମ ଓ ଦ୍ୱିତୀୟ ଡୋଜ୍‌ ଟିକା ନେଇ ସାରିଲେଣି ବୋଲି କମିଶନର କହିଛନ୍ତି।

Khansweb Solution Bhubaneswar

Leave A Reply

Your email address will not be published.