ମୁମ୍ବଇ,(ବ୍ୟୁରୋ) : ଦେଶରେ କରୋନା ଭୂତାଣୁ ରୋଗୀଙ୍କ ସଂଖ୍ୟା ଦିନକୁ ଦିନ ବୃଦ୍ଧି ପାଇବାରେ ଲାଗିଛି। ଏହାକୁ ଦୃଷ୍ଟିରେ ରଖି ସରକାର ଆଜି ତାଲା ବନ୍ଦ ଅବଧିକୁ ମେ ୩ ତାରିଖ ପର୍ଯ୍ୟନ୍ତ ବୃଦ୍ଧି କରିବାକୁ ନିର୍ଦ୍ଦେଶ ଦେଇଛନ୍ତି। ଏଥି ସହିତ, ତାଲା ବନ୍ଦ ଦିନଠାରୁ ବିଭିନ୍ନ ସହରରେ ଫସି ରହିଥିବା ପ୍ରବାସୀ ଶ୍ରମିକମାନେ ନିଜ ଘରକୁ ପଳାଇବାକୁ ଚେଷ୍ଟା କରୁଛନ୍ତି।
ଆଜି ହଜାର ହଜାର ପ୍ରବାସୀ ଶ୍ରମିକ ଘରକୁ ଯିବା ପାଇଁ ମହାରାଷ୍ଟ୍ରର ରାଜଧାନୀ ମୁମ୍ବାଇର ବାନ୍ଦ୍ରା ଷ୍ଟେସନରେ ଏକାଠି ହୋଇଥିଲେ। ଏଠାରେ ସେମାନେ ନିଜ ନିଜ ଘରକୁ ଯିବାକୁ ଦାବି କରିବା ଆରମ୍ଭ କରିଥିଲେ। ସେମାନଙ୍କୁ ହଟାଇବା ପାଇଁ ପୁଲିସ ଲାଠିଚାର୍ଜ କରିଥିବା ଜଣାପଡ଼ିଛି। ପୁଲିସର କାର୍ଯ୍ୟାନୁଷ୍ଠାନ ପରେ ଲୋକମାନେ ସେଠାରୁ ବିଚ୍ଛିନ୍ନ ହୋଇଯାଇଥିଲେ।
ଏନେଇ ସ୍ଥାନୀୟ ନେତାମାନେ କହିଛନ୍ତି ଯେ, ପ୍ରବାସୀ ଶ୍ରମିକମାନଙ୍କର କୌଣସି ଅସୁବିଧା ହେବ ନାହିଁ ବୋଲି ତାଙ୍କୁ ବୁଝାଯାଉଛି ଏବଂ ସେମାନଙ୍କୁ ସମସ୍ତ ସମ୍ଭାବ୍ୟ ସହାୟତା ଦିଆଯିବ। ମହାରାଷ୍ଟ୍ର ଗୃହମନ୍ତ୍ରୀ ଅନିଲ ଦେଶମୁଖ କହିଛନ୍ତି ଯେ, ଏହି ଶ୍ରମିକମାନଙ୍କ ଖାଦ୍ୟ ପାଇଁ ମହାରାଷ୍ଟ୍ର ସରକାର ବ୍ୟବସ୍ଥା କରିବେ। ଆମେ ଶ୍ରମିକମାନଙ୍କୁ ବୁଝାଉଛୁ ଯେ ଆମେ ସେମାନଙ୍କର ଅବସ୍ଥା ସୁଧାରିବା ପାଇଁ ଯଥାସମ୍ଭବ ଚେଷ୍ଟା କରିବୁ।
ଏହି ଘଟଣାକୁ ନେଇ ଆଦିତ୍ୟ ଠାକରେ ଟ୍ୱିଟ୍ କରିଛନ୍ତି। ସେ କହିଛନ୍ତି ଯେ, ବର୍ତ୍ତମାନ ବାନ୍ଦ୍ରା ଷ୍ଟେସନରେ ଶ୍ରମିକମାନଙ୍କୁ ହଟାଇ ଦିଆଯାଇଛି।
