ଭୁବନେଶ୍ୱର, ୨୧/୪(ବ୍ୟୁରୋ): ଶ୍ରୀ ଶିରିଡି ସାଇ ଟ୍ରଷ୍ଟ ପକ୍ଷରୁ ଭ୍ରାମ୍ୟମାଣ ଜଳଛତ୍ର ପଟିଆସ୍ଥିତ ଶିରିଡି ସାଇ ଛକ ଠାରେ ଉଦ୍ଘାଟିତ ହୋଇଯାଇଛି । ଟ୍ରଷ୍ଟର ଅଧ୍ୟକ୍ଷ ତଥା ୧ ନମ୍ବର ୱାର୍ଡର କର୍ପୋରେଟର ମିହିର ରାଉତଙ୍କ ନେତୃତ୍ୱରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ଭୁବନେଶ୍ୱରର ମେୟର ସୁଲୋଚନା ଦାସ ଯୋଗଦେଇ ଉଦ୍ଘାଟନ କରିବା ସହିତ କହିଥିଲେ ବର୍ତ୍ତମାନ ପ୍ରଚଣ୍ଡ ଖରା ହେଉଥିବାରୁ ଏହି ଜଳସେବା ପଥିକ ମାନଙ୍କୁ ବେଶ ସହାୟକ ହେବ । ଲୋକଙ୍କ ପାଖରେ ଯାଇ ପାଣି ପହଞ୍ଚିବ। ହାତ ପାହାନ୍ତାରେ ପଥଚାରୀ ବିଶୁଦ୍ଧ ପାଣି ପାଇ ପାରିବେ।
ଏହା ସହ ମିହିର ରାଉତଙ୍କ ଏହି ଜନସେବା କାର୍ଯ୍ୟକୁ ପ୍ର୍ରଶଂସା କରିଥିଲେ । ଅନ୍ୟତମ ଅତିଥିଭାବେ ୨ନଂ ୱାର୍ଡର କର୍ପୋରେଟର ମୋନାଲିସା ବେହେରା ଯୋଗଦେଇ ଦହିପାଣି ବଣ୍ଟନ କରିଥିଲେ । ଏହି ଭ୍ରାମ୍ୟମାଣ ଜଳସେବା ପଟିଆ ଛକଠାରୁ ଜୟଦେବ ବିହାର ଛକ ପର୍ଯ୍ୟନ୍ତ ପ୍ରତ୍ୟେକ ଦିନ ଯାତ୍ରା କରିବ । ପ୍ରତି ଛକରେ କିଛି ସମୟ ରହି ଦହିପାଣି ଓ ବିଶୁଦ୍ଧ ଥଣ୍ଡାପାଣି ବଣ୍ଟନ କରାଯିବ ବୋଲି ମିହିର ରାଉତ କହିଛନ୍ତି । କର୍ପୋରେଟରଙ୍କର ଏହି କାର୍ଯ୍ୟକୁ ସ୍ଥାନୀୟ ଅଞ୍ଚଳବାସୀ ପ୍ରଶଂସା କରିଛନ୍ତି ।
