ଭୁବନେଶ୍ୱର, ୧୬।୧୨(ବ୍ୟୁରୋ): ରାଜଧାନୀ ଭୁବନେଶ୍ୱର ଓ ବ୍ୟବସାୟିକ ରାଜଧାନୀ କଟକରେ ଦିନକୁ ଦିନ ଅପରାଧ ବଢିବାରେ ଲାଗିଛି। ଏହା କମିଶନରେଟ ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରୁଥିବାବେଳେ ଅପରାଧ ନିୟନ୍ତ୍ରଣ ପାଇଁ ସ୍ବତନ୍ତ୍ର ଅପରାଧ ଅନୁସନ୍ଧାନ ଶାଖା ଖୋଲିବାକୁ ରାଜ୍ୟ ସରକାର ନିଷ୍ପତ୍ତି ନେଇଛନ୍ତି। ଏ ସଂକ୍ରାନ୍ତ ପ୍ରସ୍ତାବକୁ ବୁଧବାର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ମଞ୍ଜୁରୀ ଦେଇଛନ୍ତି। ଏହି ଅପରାଧ ଶାଖା ଦାୟିତ୍ୱରେ ଜଣେ ସ୍ବତନ୍ତ୍ର ଡିସିପିଙ୍କୁ ନିଯୁକ୍ତି ଦିଆଯିବ। ଏଥିସହ ଜଣେ ଅତିରିକ୍ତ ଡିସିପି, ୩ ଏସିପି, ୯ ଇନ୍ସପେକ୍ଟର, ୧୨ ସବ୍ଇନ୍ସପେକ୍ଟର, ୩ ଏଏସ୍ଆଇ, ୩ କନ୍ଷ୍ଟେବଳ (ଯୋଗାଯୋଗ) ଏବଂ ୨୭ଜଣ କନ୍ଷ୍ଟେବଳଙ୍କୁ ମିଶାଇ ମୋଟ ୫୯ଜଣ କାର୍ଯ୍ୟ କରିବେ। ବିଶେଷକରି ସଂଗଠିତ ଅପରାଧ, ଅର୍ଥନୈତିକ ଅପରାଧ ଓ ନିଶାଦ୍ରବ୍ୟ ସମ୍ପର୍କିତ ବିଭିନ୍ନ ଅପରାଧ ରୋକିବା କ୍ଷେତ୍ରରେ କମିଶନରେଟ ପୋଲିସର ଏହି ସ୍ବତନ୍ତ୍ର ଅପରାଧ ଶାଖା ତଦନ୍ତ କ୍ଷେତ୍ରରେ ପ୍ରମୁଖ ଭୂମିକା ଗ୍ରହଣ କରିବ।
ସେହିପରି କମିଶନରେଟ ପୋଲିସ ଅଞ୍ଚଳରେ ଜନସଂଖ୍ୟା ବୃଦ୍ଧିକୁ ନଜରରେ ରଖି ଓ ଲୋକଙ୍କୁ ଉତ୍ତମ ପୋଲିସ ସେବା ଯୋଗାଇଦେବା ପାଇଁ ମୁଖ୍ୟମନ୍ତ୍ରୀ ୩ ନୂତନ ଥାନାକୁ ମଞ୍ଜୁରୀ ପ୍ରଦାନ କରିଛନ୍ତି। ସେହି ନୂଆ ଥାନାଗୁଡ଼ିକ ହେଲା ପାହାଳ, ଇନ୍ଫୋଭ୍ୟାଲି ଓ ବୟାଳିଶମୌଜା/ବେଣ୍ଟକାର। ଏଥିପାଇଁ ଭୁବନେଶ୍ୱର ଅର୍ବାନ ପୋଲିସ ଅନ୍ତର୍ଗତ ବାଲିଅନ୍ତା ଥାନା ଅଧୀନରେ ଥିବା ପାହାଳ ଫାଣ୍ଡି, ଜଟଣୀ ଥାନା ଅଧୀନରେ ଥିବା ଇନ୍ଫୋଭ୍ୟାଲି ଫାଣ୍ଡି ଓ କଟକ ଅର୍ବାନ ପୋଲିସ ଅନ୍ତର୍ଗତ କଟକ ସଦର ଥାନା ଅଧୀନରେ ଥିବା ବେଣ୍ଟକାର ଫାଣ୍ଡିକୁ ଥାନାରେ ଉନ୍ନୀତ କରାଯାଇଛି।
ମୁଖ୍ୟମନ୍ତ୍ରୀଙ୍କ ଘୋଷଣା ପରେ ପୋଲିସ କମିଶନର ସୌମେନ୍ଦ୍ର ପ୍ରିୟଦର୍ଶୀ ଏକ ସାମ୍ବାଦିକ ସମ୍ମିଳନୀ କରି କହିଛନ୍ତି, କମିଶନରେଟ ପୋଲିସ ଅଞ୍ଚଳରେ ଜନସଂଖ୍ୟା, ଯାନବାହାନ ଏବଂ କଳେବର ବୃଦ୍ଧି ଦୃଷ୍ଟିରୁ ଦିନକୁ ଦିନ ଚ୍ୟାଲେଞ୍ଜିଂ ହୋଇରହିଛି। ଏହାକୁ ରୋକିବାକୁ ହେଲେ କ୍ୱାଲିଟି ପୋଲିସିଂର ଆବଶ୍ୟକତା ଥିଲା। ମୁଖ୍ୟମନ୍ତ୍ରୀଙ୍କ ଦୟାରୁ ଏହି ଆବଶ୍ୟକତା ଆଜି ପୂର୍ଣ୍ଣ ହୋଇଛି। ଯେଉଁ ଘୋଷାଣା କରାଯାଇଛି, ଆମେ ତାକୁ ଅତିଶୀଘ୍ର ରୂପରେଖ ଦେବୁ। ଖୋଲିବାକୁ ଥିବା ୩ଟି ଥାନାକୁ ତୁରନ୍ତ୍ର କାର୍ଯ୍ୟକ୍ଷମ କରାହେବ। ଏଥିସହ ସାଇବର କ୍ରାଇମ୍ ଓ ଇକୋନୋମିକ୍ ଅଫେନ୍ସ ଥାନାକୁ କାର୍ଯ୍ୟକ୍ଷମ କରିବୁ ଏବଂ ଅତିଶ୍ରୀଘ୍ର କ୍ରାଇମ୍ ଡିସିପିଙ୍କୁ ନିଯୁକ୍ତି ଦିଆଯିବ। ଏହାଦ୍ୱାରା ଅପରାଧ ଦମନ କ୍ଷେତ୍ରରେ ବହୁ ମାତ୍ରାରେ ଉନ୍ନତି ହେବ ବୋଲି ଦୃଢବିଶ୍ୱାସ ରହିଛି। ଟୁଇନ୍ ସିଟିରେ ଜନସାଧାରଣ ଅଧିକ ସୁରକ୍ଷିତ ହେବେ ବୋଲି କମିଶନର କହିଛନ୍ତି।
ସୂଚନାଯୋଗ୍ୟ, ବର୍ତ୍ତମାନ ଦ୍ୱୈତନଗରୀରେ ଆପରାଧିକ କାର୍ଯ୍ୟାକଳାପ ବୃଦ୍ଧିପାଉଛି। ଛୋଟ ଅପରାଧୀଙ୍କଠାରୁ ଗ୍ୟାଙ୍ଗଷ୍ଟର୍ କଟକ ଓ ଭୁବନେଶ୍ୱରକୁ ଆଡ୍ଡାସ୍ଥଳ କରିଥିବା ପୂର୍ବରୁ ନଜିର ରହିଛି। ଯୁବଗୋଷ୍ଠୀ ବ୍ରାଉନ୍ସୁଗାର ଭଳି ନିଶା କାରବାରରେ ଲିପ୍ତ ରହି ଅପରାଧ ଘଟାଉଛନ୍ତି। ବସ୍ତି ଅଞ୍ଚଳରେ କଥା କଥାରେ ଖଣ୍ଡା, ଭୁଜାଲି ବୁଲିବା ସହ ଗୁଳି ଫୁଟୁଛି। ଦିନରାତି ଲୁଟେରାମାନେ ଆତଙ୍କ ଖେଳାଉଛନ୍ତି। ଲୁଟ୍ ପାଇଁ ରକ୍ତପାତ ସହ ଜୀବନ ନେଉଛନ୍ତି। ଆଇନଶୃଙ୍ଖଳା, ସଂଗଠିତ ଅପରାଧ, ଟ୍ରାଫିଟ୍ ଜାମ୍ ଓ ଆନ୍ଦୋଳନ ଆଦି ପୋଲିସ ପାଇଁ ଚ୍ୟାଲେଞ୍ଜ ସୃଷ୍ଟି କରୁଛି। ଏବେ ଦୁଇ ସହରରେ ୨ଜଣ ଡିସିପି କାର୍ଯ୍ୟ ତୁଲାଉଛନ୍ତି। ତେବେ ବଡ଼ ଅପରାଧର ବଳିଷ୍ଠ ତଦନ୍ତ ଏହି ସ୍ବତନ୍ତ୍ର ଅପରାଧ ଶାଖା କରିବ।
