କଲିକତା,୮/୫ : ନବଗଠିତ ପଶ୍ଚିମବଙ୍ଗ ବିଧାନସଭାର ପ୍ରଥମ ଅଧିବେଶନ ଶନିବାରଠାରୁ ଆରମ୍ଭ ହୋଇଛି। ତୃଣମୂଳ କଂଗ୍ରେସ ବିଧାୟକ ବିମାନ ବାନାର୍ଜୀ ବାଚସ୍ପତି ଭାବେ ନିର୍ବାଚିତ ହୋଇଛନ୍ତି। କ୍ରମାଗତଭାବେ ତୃତୀୟଥର ଲାଗି ସେ ବିଧାନସଭା ବାଚସ୍ପତି ଭାବେ ନିର୍ବାଚିତ ହୋଇଛନ୍ତି। ରାଜ୍ୟ ବିଧାନସଭା ଅଧିବେଶନର ପ୍ରଥମ ବୈଠକରେ ଶନିବାର ଶ୍ରୀ ବାନାର୍ଜୀଙ୍କୁ ମୌଖିକ ଭୋଟରେ ସର୍ବସମ୍ମତି କ୍ରମେ ବାଚସ୍ପତି ଭାବେ ନିର୍ବାଚିତ କରାଯାଇଛି।
ଅନ୍ୟପକ୍ଷରେ ବିଜେପି ବିଧାୟକମାନେ ଅଧିବେଶନକୁ ବର୍ଜନ କରିଛନ୍ତି। ରାଜ୍ୟରେ ନିର୍ବାଚନ ପରବର୍ତ୍ତୀ ହିଂସା ବନ୍ଦ ନ ହେବା ପର୍ଯ୍ୟନ୍ତ ବାଚସ୍ପତି ନିର୍ବାଚନ ଓ ନୂଆ ବିଧାନସଭା ଅଧିବେଶନରେ ଯୋଗ ନ ଦେବାକୁ ବିଜେପି ବିଧାୟକମାନେ ନିଷ୍ପତ୍ତି ନେଇଛନ୍ତି। ଇତିମଧ୍ୟରେ ମୁଖ୍ୟମନ୍ତ୍ରୀ ମମତା ବାନାର୍ଜୀ କହିଛନ୍ତି ଯେଉଁ ସ୍ଥାନମାନଙ୍କରେ ହିଂସାକାଣ୍ଡ ଘଟିଥିବା ଖବର ମିଳିଛି, ସେହିସବୁ ଅଞ୍ଚଳରେ ଏଫ୍ଆଇଆର୍ ରୁଜୁ କରିବା ପାଇଁ ନିର୍ଦ୍ଦେଶ ଜାରି କରାଯାଇଛି। ସମସ୍ତ ବିଧାୟକ ସେମାନଙ୍କର ନିଜ ନିଜ ଅଞ୍ଚଳର ଶାନ୍ତିଶୃଙ୍ଖଳା ପ୍ରତି ଧ୍ୟାନ ଦେବାକୁ ସେ ପରାମର୍ଶ ଦେଇଛନ୍ତି।
ଆସନ୍ତା ସୋମବାର ଦିନ ରାଜ୍ୟ ରାଜଭବନରେ କ୍ୟାବିନେଟ୍ ମନ୍ତ୍ରୀମାନେ ଶପଥ ନେବେ। ଶପଥ ଗ୍ରହଣ ଉତ୍ସବ ପରେ ରାଜ୍ୟ ସଚିବାଳୟରେ ପ୍ରଥମ କ୍ୟାବିନେଟ୍ ବୈଠକ ବସିବ।
