ଭୁବନେଶ୍ବର,୨୬/୭(ଓଡ଼ିଆ ନ୍ୟୁଜ): ଓଡିଆ ବ୍ୟଙ୍ଗକାର ମାନଙ୍କର ନିରନ୍ତର ସାଧନା ବଳରେ ହାସ୍ୟବ୍ୟଙ୍ଗ ସାହିତ୍ୟ ଅଶ୍ଲୀଳତାର ଅପବାଦରୁ ମୁକ୍ତ ହୋଇଛି ବୋଲି ଅାଜି ଆୟୋଜିତ ୨ୟ ଅନ୍ ଲାଇନ୍ ହାସ୍ୟକବି ସମ୍ମିଳନୀରେ ବିଶିଷ୍ଟ ଅତିଥିମାନେ ମତ ପ୍ରକାଶ କରିଛନ୍ତି ।
ଓଡିଆ ହାସ୍ୟକବି ସମ୍ମିଳନୀର ସଂଯୋଜକ ଡଃ କୁଳାଙ୍ଗାରଙ୍କ ପୈାରହିତ୍ୟରେ ଆୟୋଜିତ ଅନ୍ ଲାଇନ୍ ଆସରକୁ ଉଦଘାଟନ କରି ପ୍ରସିଦ୍ଧ ବ୍ୟଙ୍ଗକବି ଜ୍ଞାନ ହୋତା ଯୋଗ ଦେଇ ବିପତ୍ତି କାଳରେ ଏପରି କାର୍ଯ୍ୟକ୍ରମର ଆବଶ୍ୟକ ଅଛି ବୋଲି ମତ ଦେବା ସହିତ କହିଥିଲେ କି; ଏବେ ହାସ୍ୟବ୍ୟଙ୍ଗ ସାହିତ୍ୟ କେବେ ଅଶ୍ଲୀଳ ନଥିଲା, ନିରନ୍ତର ପ୍ରୟାସ ଅଶ୍ଲୀଳତାର ଅପବାଦରୁ ମୁକ୍ତ କରିଛି ଏବଂ ଏବେ ବ୍ୟଙ୍ଗକାର ତାରକା ।
କାର୍ଯ୍ୟକ୍ରମର ମୂଖ୍ୟ ଅତିଥି ପ୍ରଖ୍ୟାତ ହାସ୍ୟକବି ଶ୍ରୀଯୁକ୍ତ ସତ୍ୟାନାଶ ଏପରି କାର୍ଯ୍ୟକ୍ରମର ଆୟୋଜନକୁ ପ୍ରଶଂସା କରିବା ସହିତ ହାସ୍ୟ,ବ୍ୟଙ୍ଗକାର ମାନଙ୍କର ସଙ୍ଗଠନର ଆବଶ୍ୟକତା ସମ୍ପର୍କରେ ଗୁରୁତ୍ବାରୋପ କରିଥିଲେ ।
ଅନ୍ୟତମ ଅତିଥି ବିଶିଷ୍ଟ ହିନ୍ଦି ହାସ୍ୟକବି ରାମକିଶୋର ଶର୍ମା ଏହି କାର୍ଯ୍ୟକ୍ରମକୁ ଐତିହାସିକ ବିବେଚନା କରିବା ସହିତ ବହୁ ସଂଖ୍ୟାରେ ଯୋଗ ଦେଇଥିବା ଯୁବକବିଙ୍କୁ ସ୍ବାଗତ ଜଣାଇଥିଲେ ।
ପରେ ପରେ ଗୁଗୁଲ୍ ମିଟ୍ ଜରିଆରେ ଆୟୋଜିତ ହାସ୍ୟକବି ସମ୍ମିଳନୀରେ କବିମାନେ ନିଜର ହାସ୍ୟବ୍ୟଙ୍ଗ କବିତାରେ ସାମ୍ପ୍ରତିକ କରୋନା ଜନିତ ସାମାଜିକ, ରାଜନୈତିକ ଓ ପାରିବାରିକ ଅବସ୍ଥାକୁ ଉପସ୍ଥାପନ କରାଇଥିଲେ । ଡଃ କୁଳାଙ୍ଗାରଙ୍କ ସଂଯୋଜନାରେ ଆୟୋଜିତ ଏହି ଆସରରେ ଓଡିଶାର ବିଭିନ୍ନ ପ୍ରାନ୍ତରୁ କବି ସର୍ବଶ୍ରୀ ଅବାଗିଆ, ରବୀନ୍ଦ୍ର ରାଉତ, ଗୋପୀନାଥ ମଲ୍ଲିକ, ପ୍ରବୀଣ ସୁବୁଦ୍ଧି, ରାଜେଶ କୁମାର ଶତପଥି, ଜ୍ଞାନ ରଞ୍ଜନ ପ୍ରଧାନ, ସଞ୍ଜୟ ସାହୁ, ସୂର୍ଯ୍ୟନାରାୟଣ ମିଶ୍ର, ଶ୍ରୀଯୁକ୍ତ ସତ୍ୟାନାଶ, ଗିରିଶ ରଞ୍ଜନ, ସନାତନ କଟ, ଜଗନ୍ନାଥ ଚୈାଧୁରୀ, ସନ୍ତୋଷ କୁମାର ସାହୁ, ସୁଜିତ ଶତପଥି, ଜଗଦୀଶ ସାହୁ ଓ ଅଲେଖ ପ୍ରସାଦ ମହାରଣା ପ୍ରମୁଖ କବିତା ପାଠ କରିଥିଲେ । ଶେଷରେ ଶାରଦା ପ୍ରସାଦ ମହାପାତ୍ର ଆନୁଷ୍ଠାନିକ ଧନ୍ୟବାଦ ଅର୍ପଣ କରିଥିଲେ ।
