ଭୁବନେଶ୍ୱର : ଜୀବନ ଜାଗୃତି କଲ୍ୟାଣ ଟ୍ରଷ୍ଟ ପକ୍ଷରୁ ଲକ୍ଷ୍ମୀ ବିହାର ସ୍ଥିତ ଓମ୍ ସାଇ ଅସ୍ଥି ଓ ଖଞ୍ଜା ହସ୍ପିଟାଲ ପରିସରରେ ରକ୍ତଦାନ ଶିବିର ଅନୁଷ୍ଠିତ ହୋଇଯାଇଛି । ଟ୍ରଷ୍ଟର ଅଧ୍ୟକ୍ଷା ଡାକ୍ତର ଗୀତାଞ୍ଜଳି ଆରୋରାଙ୍କ ନେତୃତ୍ୱରେ ଓ ହସ୍ପିଟାଲର ମୁଖ୍ୟ ଡାକ୍ତର ସୁନୀଲ ଦାସଙ୍କ ତତ୍ୱାବଧାନରେ ଅନୁଷ୍ଠିତ ଏହି ଶିବିରରେ ମୁଖ୍ୟ ଅତିଥି ଭାବେ ଉତ୍ତର ବିଧାୟକ ସୁଶାନ୍ତ କୁମାର ରାଉତ ଯୋଗଦେଇ କହିଥିଲେ ରକ୍ତ ଅଭାବରୁ ଯେପରି କାହାର ଜୀବନ ନ ଯାଉ ସେଥିପାଇଁ ମାନ୍ୟବର ମୁଖ୍ୟମନ୍ତ୍ରୀ ନବୀନ ପଟ୍ଟନାୟକ ବିଜେଡିର ସମସ୍ତ କର୍ମକର୍ତ୍ତା, ଯୁବ, ଛାତ୍ର ଓ ସମସ୍ତଙ୍କୁ ରକ୍ତଦାନ କରିବା ପାଇଁ ଆହ୍ୱାନ ଦେଇଛନ୍ତି । ତେଣୁ ଆମେ ଜଣେ ରୋଗୀର ଜୀବନ ବଞ୍ଚାଇବା ପାଇଁ ଯଥା ସମ୍ଭବ ରକ୍ତଦାନ କରିବା ଆବଶ୍ୟକ ।
ସମ୍ମାନିତ ଅତିଥି ଭାବେ ୧୨ ନମ୍ବର ଓ୍ବାର୍ଡର କର୍ପୋରେଟର ଜୟନ୍ତୀ ସାହୁ, ବିଜେଡି ଜିଲ୍ଲା ସାଧାରଣ ସମ୍ପାଦକ ପ୍ରଶନ୍ନ କୁମାର ସାହୁ, ଲକ୍ଷ୍ମୀ ବିହାର ଲେନ୍ ତିନିର ସଭାପତି ଅଶୋକ ବଳବନ୍ତରାୟ ପ୍ରମୁଖ ଯୋଗଦେଇ ରକ୍ତଦାତାଙ୍କୁ ଉତ୍ସାହିତ କରିବା ସହିତ ଟ୍ରଷ୍ଟର ଏଭଳି କାର୍ଯ୍ୟକୁ ପ୍ରଶଂସା କରିଥିଲେ । ଏଥିରେ ୫୪ ୟୁନିଟ ରକ୍ତ ସଂଗୃହୀତ ହୋଇଥିଲା । ରବିଶଙ୍କର ନାୟକ ସହଯୋଗ କରିଥିଲେ ।
